Vetëm pak ditë më parë kryeministri Edi Rama tha në mes të Kuvendit se në Durrës është një prokuror që ka lidhje me bandat e krimit dhe i bën presion nëpunësve të administratës, por pa përmendur emra. Ndërsa një ditë pas kësaj deklarate të Ramës, ishte zv.kryeministri Erion Braçe që foli me emra dhe zbuloi se bëhej fjalë për prokurorin Arian Ndoja.
Kryeministri Edi Ramaa i është rikthyer sërish këtij rasti sot gjatë takimit të përjavshëm me “platformën bashkëqeverisëse”, dhe e paralajmëroi prokurorin Ndoja se nuk do t’i shpëtojë ndëshkimit, dhe se bashkë me prokurorët e gjyqtarët e tjerë të korruptuar, do të japin llogari për pasurinë e tyre.
Ndër të tjera, kryeministri ka deklaruar se asnjë prokuror dhe gjyqtar nuk do t’i shpëtojë dot paratë e zeza të krimit dhe shpërblimet e majme të përfituara nga organizatat kriminale, edhe pasi Vettingu i përjashton. Sipas Ramës, të gjithë prokurorët dhe gjyqtarët, që shkarkohen nga Vettingu, do të rikthehen për të dhënë llogari.
“Qytetarët nuk e hedhin fjalën në erë, por kur na adresohen, marrin përgjigje. 34 mijë ankesa kanë marrë përgjigje pozitive, ndërsa kur qytetarët të dëshpëruar na drejtohen për sistemin e drejtësisë, por ne nuk kemi mundësi të ndërhyjmë.
Ju e patë vetë javën e kaluar, të transformimit të një figure të sistemit të drejtësisë me përfaqësues të interesave të krimit, që sigurisht nuk do t’i shpëtojë ndëshkimit, por ama kur vjen puna te ndërhyrja në proces, kjo është e pamundur për qeverinë, për pushtetin ekzekutiv, sepse Kushtetua përcakton qartë kufijtë e çdo pushteti dhe kufizimet që ne kemi, pavarësisht se mund të jetë e drejtë ajo që qytetari kërkon.
Fatkeqësisht po shohim se pastrimi i llumit nga sistemi i drejtësisë ka dhe një efekt negativ, sepse shumë prokurorë e gjykatës që janë të zhytur deri në fyt, po e shfrytëzojnë pushtetin që ju jep ligji me moton ‘të kapin, çfarë të kapim’. Ata nuk kuptojnë që ndërtimi i sistemit të ri të drejtësisë kërkon kohë.
Ata që Vettingu i përjashton, do të rikthehen para prokurorëve dhe gjykatëse për të dhënë llogari për pasurinë e tyre, të jenë të sigurt. Edhe ata që bëjnë krime për të përfituar para të zezë, apo shpërblime të majme nga organizata kriminale, drejtësia mbi ta mund të vonojë dhe pak, por nuk do të harrojë”, tha Rama.
