“Kurir.rs”, një nga mediat e njohura serbe, ka “pikasur” një shqiptar, që qenka tifoz me Crvena Zvezda, bëka tifo si i çmendur për kundërshtarin e radhës të Tiranës në Champions dhe Serbinë. Ja shkrimi “ekzotik”:
“Drejtuesi i tifozëve të Skënderbeut në Shqipëri, nga Korça (48 vjeç), nuk e fsheh se është një tifoz i madh i Crvena Zvezda dhe i Serbisë. Atë e quajnë Genci Serbi dhe dihet që ka qenë tifoz i kuqebardhëve prej 35 vitesh.
“Në zemrën time janë vetëm Zvezda dhe skuadra jonë, Skënderbeu i Korçës, që është më e mira në Shqipëri. Dashuria ime për këtë klub serb lindi ndërsa Dejan Stankovic, Dejan Savicevic, Darko Pancev, Mitar Mrkela luanin atje”, – tha shqiptari.
Ai thekson se miqtë e tij nuk e kanë mendjen të brohorasin për skuadrën serbe. Personalisht nuk është i interesuar për politikën dhe nuk ka frikë se për shkak të dashurisë së tij për Serbinë, ai mund të ketë probleme në Shqipëri.
“Që fëmijë fillova të brohorisja për Zvezda. Unë shkoj të luftoj me Zvezda”, – thotë Genci.
Ai, gjithashtu, ua ka transmetuar fëmijëve të tij dashurinë për Zvezda. Dhoma ku rri është në ngjyrat dhe simbolet e klubit serb, madje ka një tatuazh të “Delija” në krah.
“Unë vij në Beograd disa herë në vit. Ish-kapiteni i Zvezda, Ivan Gvozdenović, luajti këtu te Skënderbeu, me të cilin u lidha shumë. Unë isha në Beograd kur luajti Serbia kundër Kroacisë. Mbështeta Serbinë. Isha i vetmi shqiptar, që erdha për të mbështetur kombëtaren serbe. Të martën do të mbështes Zvezda, të gjithë le të më sulmojnë, nuk ka asnjë problem”, – shton shqiptari.
Genci është i bindur që Zvezda do të regjistrojë një triumf bindës në Tiranë, të martën: “Në pjesën e parë, rezultati do të jetë 1-0 për Zvezda. Më pas, futbollistët e Tiranës do të lodhen”.
