Mazhoranca pritet të shtojë masat izoluese ndaj presidentit Ilir Meta. Pak ditë më parë gazeta bëri publike disa detaje nga drafti i propozuar nga Partia Socialiste, i cili synon të nxjerrë jashtë loje Metën, duke i rrudhur të drejtën e betimit për anëtarët e SPAK, gjyqtarët e Gjykatës së Lartë dhe Kushtetuese, pasi kjo kategori do betohen me shkrim. Por duket se socialistëve nuk iu del inati me kreun e shtetit, i cili shpesh herë është bërë pengesë për ngritjen e institucioneve të reja të drejtësisë dhe jo vetëm.
Kjo pasi duket se nga viti që vjen zoti Meta nuk do ta ketë më të lehtë të bëjë të tilla manovra. Gjatë një prononcimi për mediat, kryetari i Komisionit të Ligjeve, Ulsi Manja, teksa dha detaje të nismave ligjore, të cilat ndërhyjnë në dy ligjet “Për organizimin e Gjykatës Kushtetuese” dhe “Për statusin e gjyqtarëve e prokurorëve”, zbuloi se mazhoranca nuk do të mjaftohet vetëm me këto. Në këtë pikë, zoti Manja theksoi se drafti që saktëson se gjyqtari i emëruar në Gjykatë Kushtetuese, që nuk thirret për betim në Presidencë, e kryen betimin në formë të shkruar, mund të ndryshojë duke hequr kufizimin, e duke përcaktuar se ceremonia e betimit mund të organizohet pranë Gjykatës Kushtetuese. “Ne kemi edhe një propozim tjetër, ku këtë draft që flet për bërjen e betimit me shkrim, mund ta lehtësojmë si procedurë, pasi mund të jetë edhe në një formë tjetër.
Pra, formula e betimit mund të mos bëhet në formë shkresore siç propozohet nga 3 deputetë socialistë, por në rastin e gjyqtarëve kushtetues, nëse kreu i shtetit brenda 10 ditëve nuk e zhvillon ceremoninë e betimit, atëherë pas këtij afati ky betim mund të zhvillohet në Gjykatën Kushtetuese”, deklaroi ai.
Shtrirja e parashikimeve ligjore
Por përveç propozimit që një anëtar nëse nuk thirret nga presidenti për betim brenda dhjetë ditësh, mund ta bëjë atë me shkrim apo në Gjykatën Kushtetuese, mazhoranca po propozon që këto ndryshime të shtrihen edhe më tej. Gjatë fjalës së tij, kryetari i Komisionit të Ligjeve, Ulsi Manja u shpreh se gjatë diskutimit të këtij drafti që pritet të nisë në janar në komisionet parlamentare, do të futen edhe alternativa të tjera. Sipas tij, përveç alternativës që një anëtar i Kushtetueses do të betohet në këtë gjykatë, e njëjta gjë do të ndodhë edhe për anëtarët e tjerë të institucioneve, të cilët mund ta bëjnë betimin në institucionin ku janë emëruar. “Po ashtu dhe për institucionet e tjera që kanë këtë detyrim në rast se nuk e respektojnë, kjo ceremoni të zhvillohet në institucionet e emërtesës”, u shpreh ai. Pra, përmes këtyre ndryshimeve Partia Socialiste synon izolimin total të presidentit Ilir Meta. Por në rast të dytë, në rast se anëtari i zgjedhur apo i shpallur i emëruar nuk paraqitet për të bërë betimin bie mandati.
Në pranverë del jashtë loje Vitore Tusha
Por përveç izolimit të presidentit Ilir Meta mazhoranca synon që të nxjerrë jashtë loje edhe Vitore Tushën. Kjo e fundit është kryetare në detyrë në Gjykatën Kushtetuese. Mirëpo, pavarësisht kësaj, zonja Tusha vijon të bëjë ligjin në këtë gjykatë edhe pse është pa mandat. Rasti më flagrant është ai i Marsida Xhaferllarit. Për emrin e saj ka një përplasje institucionale dhe në shkelje të hapur Tusha e pranoi atë si anëtare të Kushtetueses. Madje e propozoi për anëtare të KED. Por mazhoranca pritet t’i japë fund dominimit të saj, pasi në fillim të vitit që vjen PS, pasi Kushtetuesja të jetë konstituuar, do të kërkojë një vendim kolegjial nëse mandati i takon Xhaferllarit apo Arta Vorpsit. “Vendimin se kush do konsiderohet anëtare e Gjykatës Kushtetuese, Arta Vorpsi apo Marsida Xhaferllari, do e marrë Gjykata Kushtetuese”, nënvizoi Manja. Pra duket se dhe hegjemonia e Tushës do marrë fund, pasi me gjasë në pranverë ajo do largohet sepse është pa mandat. /Rigels Seliman
