Partia Socialiste ka vendosur që të mbyllë një herë e mirë reformën në drejtësi. Prej gati dy vitesh puna është ende në proces, por falë deputetëve të rinj që kanë hyrë në sallën e Parlamentit, pritet që të ketë zhvillime të reja. Aktualisht janë disa ligje të rëndësishme që nuk janë miratuar ende, ndërsa po ashtu janë 3 ligje që ka rrëzuar Gjykata Kushtetuese që nuk janë ndryshuar. Të gjitha këto nisma duan 84 vota.
Por PD e LSI për sa kohë ishin në sallën e Parlamentit refuzuan votën, duke penguar në këtë mënyrë dhe punën e organeve të reja. Dje në mbledhjen e grupit të PS, i është kushtuar një rëndësi e madhe kësaj çështjeje. Kreu i grupit parlamentar, Taulant Balla është shprehur para deputetëve se kjo reformë do të mbyllet, siç janë miratimi i disa ligjeve të saj, duan apo nuk duan PD dhe LSI. Në këtë kontekst, mësohet se kreu i grupit të PS është shprehur se do të zhbllokohet edhe puna e KLP-së dhe KLGJ-së, pasi me miratimin e këtyre ligjeve, këto dy organe do të kenë kompetenca të plota, pasi aktualisht nuk i kanë.
Madje, sipas informacioneve, Balla ka akuzuar krerët e opozitës, se këtë lëvizje po e bëjnë për të bllokuar pikërisht reformën në drejtësi dhe ngritjen e organeve të reja të drejtësisë, pasi kanë frikë nga drejtësia e re që po troket. Po ashtu, mësohet se kreu i grupit ka akuzuar opozitën se përmes kësaj sjelljeje synon që të bllokojë çeljen e negociatave me Bashkimin Europian. Nga ana tjetër, mësohet se Balla ka porositur deputetët që të zbresin çdo ditë në bazë, duke bërë fushatë për zgjedhjet lokale të 30 qershorit, pasi sipas tij, këto zgjedhje do mbahen, pavarësisht ikjes së opozitës.
Hapet rruga e luftës ndaj korrupsionit
Këshilli i Lartë Gjyqësor dhe Këshilli i Lartë i Prokurorisë po punojnë momentalisht me kompetenca të reduktuara, pasi nuk bëjnë dot emërime apo shkarkime gjyqtarësh e prokurorësh. Në janar të vitit 2017, Partia Demokratike iu drejtua Gjykatës Kushtetuese, ku kërkoi që të rrëzohej ligji për organet e reja në sistemin e drejtësisë, pra ligji për KLGJ dhe të KLP.
Mirëpo gjykata përmes një vendimi të marrë në muajin prill, pranoi pjesërisht kërkesën e PD, duke rrëzuar vetëm 5 nene nga ligji, dhe më konkretisht nenin 61 dhe 159 që kanë të bëjnë drejtpërdrejtë me funksionimin e KLGJ dhe KLP. Në këto nene përcaktohen kompetencat e mbledhjes së KLGJ e KLP, që kanë të bëjmë me emërimet, shkarkimet, masat disiplinore, SPAK, e çështje të tjera. Por duke qenë se nenet nuk janë ndryshuar atëherë kjo ka sjellë vështirësi. Por në mbledhjen e djeshme është vendosur që të bëhet sa më shpejt ndryshimi i ligjit me qëllim që KLGJ e KLP të jenë tërësisht funksionale.
Sapo të zyrtarizohen anëtarët e Këshillit të Legjislacionit nga opozita e re, do nisë menjëherë puna. Por kjo ndihmon dhe SPAK. Momentalisht emrat që do futen aty do kenë mandat të përkohshëm, por me ndryshimin e neneve, KLGJ e KLP marrin vendim që ata të jenë me mandat të plotë 9 vjeçar. Pas kësaj, asgjë nuk e ndal dot luftën ndaj korrupsionit, pasi SPAK e Byroja e Hetimit do jenë gati. Po ashtu do miratohen dhe reforma zgjedhore dhe një sërë ligjesh të tjera që duan 84 vota. /Kliti Topalli
