Presidenti i Rusisë, Vladimir Putin është zotuar të përdorë armë bërthamore kundër çdo vendi që guxon të “ndërhyjë” në luftën e Rusisë në Ukrainë.
Ky ishte kërcënimi i tij më i fundit kundrejt Perëndimit. Putin, duke ju drejtuar ligjvënësve në Shën Petërsburg dje, tha se përgjigjja e tij ndaj kujtdo që “kërcënon” Rusinë do të jetë “rrufe, e shpejtë’’ dhe vdekjeprurëse. “Nëse dikush synon të ndërhyjë në atë që po ndodh nga jashtë, ata duhet të dinë se kjo përbën një kërcënim strategjik të papranueshëm për Rusinë.
Ata duhet ta dinë se përgjigja jonë ndaj kundërsulmeve do të jetë e shpejtë”, tha ai. “Ne kemi të gjitha armët që na nevojiten për këtë. Askush tjetër nuk mund të mburret me këto armë. Ne do t’i përdorim ato.” Megjithëse Putini nuk i përmendi drejtpërdrejt armët bërthamore, ai me siguri po i referohej raketës së re bërthamore Sarmat 2 të Rusisë, e cila u testua për herë të parë vetëm disa ditë më parë dhe që ai mburrej se nuk ngjan me asnjë armë tjetër në botë.
Putin e bërë këtë kërcënim para ligjvënësve, gjatë të cilit foli gjerësisht për “operacionin special ushtarak” në Ukrainë, duke premtuar edhe një herë se të gjitha objektivat do të realizohen. Ai vlerësoi trupat ruse, të cilat tha se po luftonin “heroikisht” për të parandaluar një konflikt në shkallë të gjerë, shkruan Daily Mail. Duke kundërshtuar ‘’fashistët’’ perëndimorë, ai shtoi: Për vite me radhë ata e kthyen Ukrainën tonë fqinje në një anti-Rusi.
Media ruse i kërkon Putinit të zhdukë Britaninë e Madhe
Media shtetërore ruse i ka kërkuar Vladimir Putinit që të zhdukë Mbretërinë e Bashkuar me armë bërthamore për shkak të mbështetjes së saj ‘të çuditshme’ për Ukrainën. Gazetari rus Vladimir Solovyov, i referuar shpesh si propaganduesi i Putinit, bëri kërcënimin sot teksa foli me kreun e agjencisë ruse të hapësirës për raketën e re Sarmat 2 të vendit, e cila do të hyjë në shërbim gjatë këtij viti.
“Siç doli, një Sarmat do të thotë minus një Britani e Madhe,” mburrej Solovyov, duke thënë se Mbretëria e Bashkuar është bërë “plotësisht e mërzitshme”, dukshëm një referencë për mbështetjen e saj të zëshme për Ukrainën që kur Putin dha urdhrin për të pushtuar. Ai po fliste vetëm dy ditë pasi Putin pretendoi se kishte zbuluar një komplot për të vrarë Solovyov që përfshinte një “bandë neo-naziste” që merrte urdhra nga Kievi. Ukraina ka mohuar ekzistencën e ndonjë komploti të tillë.
Johnson: Putin nuk do të përdorë armë bërthamore
Kryeministri britanik, Boris Johnson ka deklaruar se nuk pret që presidenti rus Vladimir Putin të përdorë armë taktike bërthamore në Ukrainë. I pyetur nëse mendon se Putin do të konsideronte përdorimin e armëve bërthamore taktike në qoftë se do të kishte më shumë dështime ushtarake, Johnson u përgjigj: Jo, nuk do e bëjë. Gjatë fjalës së tij, Johnson vazhdoi duke thënë se është shumë e rëndësishme që Perëndimi të mos pranojë mënyrën se si rusët po përpiqen të përcaktojnë atë që po ndodh në Ukrainë.
“Ata po përpiqen ta përshkruajnë këtë si një konflikt midis Rusisë dhe Perëndimit, ose Rusisë dhe NATO-s. Kjo nuk është ajo që po ndodh”, tha kryeministri britanik. Ndërsa, Ukraina thotë se Rusinë e ka kapur frika “Kërcënimi i Moskës për rrezikun e një lufte të tretë botërore tregon se Rusia po e kupton se do të humbasë”.
Ministri i Jashtëm ukrainas Dmytro Kuleba është i bindur për këtë dhe shkruan në rrjetet sociale se Moska “humb shpresën e fundit për të frikësuar botën në mbështetjen e Ukrainës. Prandaj bëhet ligjërimi i një rreziku ‘real’ të Luftës së Tretë Botërore.
Kjo do të thotë vetëm se Moska ndjen humbje në Ukrainë. Prandaj bota duhet të dyfishojë mbështetjen e saj për Ukrainën në mënyrë që të mbizotërojë dhe të ruajë sigurinë evropiane dhe globale.”
