Për njerëzit normalë në demokraci, e majta dhe e djathta nuk e asgjësojnë njëra-tjetrën. “Asgjësim” dëgjon vetëm nga disa studio të televizioneve të Tiranës, ku ka “analistë” që Shqipërinë e njohin jo më larg se deri te sheshi “Skënderbej” –
Si zakonisht, në përfundim të votimeve, mediat nxitojnë të prodhojnë harta me ngjyrime partiake për të treguar sa më qartë, sipas tyre, se cili është qëndrimi politik i njërit apo tjetrit qark. I bien fare shkurt, duke harruar se kudo që ka të majtë, ka edhe të djathtë – dhe anasjelltas. Kjo shkurtësi bën që, në disa raste, harta të tilla të marrin edhe ngjyrim antikombëtar, pasi përdoren nga individë të papërgjegjshëm dhe u shtohen edhe disa elemente grafike fyese për popullin dhe deri luftënxitëse, siç ndodhi edhe kësaj here. Fatkeqësisht, harta të tilla mbërritën deri në ekranet e televizioneve të njohura si serioze.
Kjo më nxiti të bëj këtë paraqitje të thjeshtë të ngjyrimit politik të Qarkut Shkodër, duke nisur nga rezultatet e zgjedhjeve parlamentare të 11 majit, për t’u kthyer pas deri në ato të vitit 2013.
Zgjedhjet e 11 majit 2025
PD ka fituar 36.904 vota = 5 mandate. I shtojmë PD-së edhe të gjitha votat e tjera të partive opozitare në këtë qark – domethënë pa hyrë t’i ndajmë në majtas e djathtas – që janë 4.832 vota, dhe bëjnë gjithsej 41.736 vota. Pra, kaq vota ka opozitarizmi i djathtë së bashku me ndonjë ngjyrim të vogël majtas në Qarkun e Shkodrës.
Vazhdojmë me krahun tjetër:
PS ka fituar 34.721 vota = 4 mandate
PSD ka fituar 15.784 vota = 2 mandate
Pra, pavarësisht divergjencave të njohura tashmë gjatë kësaj fushate elektorale PSD–PS, politikisht vazhdojnë të jenë të majta.Kjo do të thotë, në shifra:
34.721 votat e PS + 15.784 votat e PSD = 50.505 vota dhe 6 mandate
Diferenca:
50.505 vota të majta – 41.736 vota të djathta = 8.796 vota dhe 1 mandat më shumë për të majtën. Me këtë rezultat, Qarku Shkodër rezulton majtas apo djathtas, si thoni?
Zgjedhjet e 25 prillit 2021
PD me koalicionin “Aleanca për Ndryshim” (AN) ka fituar 47.205 vota = 5 mandate
Nga ana tjetër:
PS fitoi 30.296 vota = 3 deputetë
PSD fitoi 16.425 vota = 2 deputetë
LSI fitoi 10.100 vota = 1 deputet
Totali i të majtës: 56.821 vota = 6 mandate
Diferenca:
56.821 vota të majta – 47.205 vota të djathta = 9.616 vota dhe 1 mandat më shumë për të majtën. Me këtë rezultat,Qarku Shkodër rezulton majtas apo djathtas, si thoni?
Zgjedhjet e vitit 2017
PD fitoi 40.763 vota = 5 mandate
Nga e majta:
PS fitoi 39.247 vota = 4 mandate
PSD fitoi 13.226 vota = 1 mandat
LSI fitoi 12.737 vota = 1 mandat
Totali i të majtës: 65.210 vota = 6 mandate
Diferenca:
65.210 vota të majta – 40.763 vota të djathta = 24.447 vota dhe 1 mandat më shumë për të majtën. Me këtë rezultat,
Qarku Shkodër rezulton majtas apo djathtas, si thoni?
Zgjedhjet e vitit 2013
Koalicioni i djathtë “Aleanca për Punësim, Mirëqenie dhe Integrim”:
PD – 45.799 vota
PR – 4.930 vota
PDSH – 1.273 vota
PAA – 915 vota
Totali: 52.917 vota = 5 mandate
Koalicioni i majtë “Aleanca për Shqipërinë Evropiane”:
PS – 37.984 vota
LSI – 12.772 vota
PSD – 569 vota
PKD – 6.764 vota
Totali: 58.089 vota = 6 mandate
Diferenca:
58.089 vota të majta – 52.917 vota të djathta = 5.172 vota dhe 1 mandat më shumë për të majtën. Me këtë rezultat,
Qarku Shkodër rezulton majtas apo djathtas, si thoni?
Përfundimi
Në zgjedhjet parlamentare të:
• 2025: e majta ka 6 mandate, 8.796 vota më shumë
• 2021: e majta ka 6 mandate, 9.616 vota më shumë
• 2017: e majta ka 6 mandate, 24.447 vota më shumë
• 2013: e majta ka 6 mandate, 5.172 vota më shumë
Për 4 zgjedhjet e fundit parlamentare (2013 – 2017 – 2021 – 2025):
• E majta ka 24 deputetë në Kuvendin e Shqipërisë
• E djathta ka 20 deputetë
Me këtë rezultat, Qarku Shkodër rezulton majtas apo djathtas, si thoni?
Për njerëzit normalë në demokraci, e majta dhe e djathta nuk e asgjësojnë njëra-tjetrën. “Asgjësim” dëgjon vetëm nga disa studio televizive të Tiranës, ku ka “analistë” që Shqipërinë e njohin jo më larg se deri te sheshi “Skënderbej”!
