Kryeministri Edi Rama ka sfiduar kryetarin e Partisë Demokratike, Lulzim Basha dhe kryetaren e Lëvizjes Socialiste për Integrim, Monika Kryemadhi, sa i takon zgjedhjeve vendore të 30 qershorit. Teksa të shtunën e 11 majit opozita do të protestojë para Kryeministrisë, i pari i qeverisë dhe të deleguarit e Partisë Socialiste në qarqe do të prezantojnë kandidatët që do të përfaqësojnë mazhorancën në 61 bashkitë. Gazeta ka siguruar disa detaje nga strategjia që do të ndiqet nga shefi i qeverisë për lançimin e kandidatëve për zgjedhjet lokale.
Sipas informacioneve, Rama ka anuluar mbledhjen e Asamblesë së PS e parashikuar për të mbajtur sot, ndërsa ka vendosur që të thërrasë vetëm Kryesinë e Partisë Socialiste për të vendosur përfundimisht se cilët do të jenë 61 kandidatët e koalicionit “Aleanca për Shqipërinë Europiane”. Fillimisht, kandidatët do të bëhen publikë në mbledhjet e Kryesive të qarqeve, organizata të cilat më pas do t’i dërgojnë listën me kandidatët e mundshëm Kryesisë së Partisë. Mësohet se kjo Kryesi do të mblidhet nesër, ndërsa pritet të diskutohet dhe debatohet për kandidatët që do përfaqësojnë koalicionin “ASHE” në këto zgjedhje.
Me gjetjen e konsensusit mes anëtarëve të Kryesisë, lista me kandidatët quhet zyrtare, ndërsa prezantimi publik i tyre pritet të bëhet sikundër u bë me deputetët gjatë zgjedhjeve parlamentare të vitit 2017. Asokohe, 12 të deleguarit e PS në qarqe dolën pas mbledhjes së Kryesisë një nga një duke bërë prezantimin e kandidatëve për deputetë për zgjedhjet parlamentare, ndërsa në të njëjtën mënyrë do të procedohet edhe për 61 kandidatët për zgjedhjet lokale.
Sipas informacioneve, të deleguarit e PS në qarqe do të dalin para mediave tek holli i selisë rozë, ku dhe do të bëjnë prezantimin e kandidatëve për çdo bashki. Megjithatë, deri më tani askush nuk ka dijeni ende nëse do jetë kandidat apo jo, pasi Rama ka preferuar që t’i lërë në ankth deputetët dhe kryebashkiakët. Por kjo lëvizje e kryeministrit Edi Rama duket se është një sfidë e hapur për Bashën dhe Kryemadhin, pasi përmes kësaj strategjie tregon vendosmërinë e tij se mazhoranca do të hyjë në zgjedhjet e 30 qershorit, pavarësisht qëndrimit të PD dhe LSI për të bojkotuar zgjedhjet lokale.
Koordinatorët do bëjnë prezantimin
Prezantimi i kandidatëve që do të përfaqësojnë koalicionin Aleanca për Shqipërinë Europiane do të bëhet nga të 12 të deleguarit e Partisë Socialiste në të 12 qarqet. Kështu, kandidatët për të gjitha bashkitë e qarkut të Fierit do të prezantohen nga koordinator Gramoz Ruçi, ndërsa kandidatët për të gjitha bashkitë e qarkut të Tiranës do t’i prezantojë koordinatorja Blerina Gjylameti.
Sakaq, kandidatët e PS për bashkitë e qarkut të Elbasanit pritet t’i prezantojë koordinatori Taulant Balla, ndërsa kandidatët për kryetar të bashkive të qarkut të Korçës pritet t’i prezantojë koordinatori Niko Peleshi. Po ashtu, kandidatët për bashkitë e qarkut të Vlorës do t’i prezantojë koordinatori Damian Gjiknuri, ndërsa kandidatët e bashkive të qarkut të Durrësit pritet t’i prezantojë koordinatori Vangjush Dako.
Sa i takon kandidatëve të bashkive për qarkun e Dibrës, pritet që t’i prezantojë koordinatorja Olta Xhaçka, ndërsa ata të bashkive për qarkun e Beratit, koordinatori Blendi Klosi. Ndërkohë kandidatët për bashkitë e qarkut të Lezhës pritet që t’i prezantojë koordinatorja Mimi Kodheli, ndërsa kandidatët e bashkive për qarkun e Gjirokastrës do t’i prezantojë koordinatori Bledi Çuçi. Nga ana tjetër kandidatët e bashkive për qarkun e Shkodrës pritet t’i prezantojë koordinatori Ditmir Bushati, ndërsa kandidatët për të gjitha bashkitë e qarkut të Kukësit do t’i prezantojë koordinatori Safet Gjici.
Rigels Seliman
