Pas akuzave për ndërhyrje në çështjen e Dritan Dajtit, kryeministri Edi Rama vendosi që të çojë në gjykatë anëtarin e kryesisë së PD-së, Çlirim Gjata. Kreu i qeverisë pohoi se ka hapur deri më tani 60 çështje, për shkak të akuzave të rreme drejtuar tij.
“Do ta çoj Çlirim Gjatën në gjykatë. Kam 60 çështje që vazhdojnë dhe do të kalojnë nga gjykata dhe do të sjellin prova për këto që thonë. Është drejtësia e re që do t’u kthehet këtyre”, tha Rama në “Real Story”.
Lidhur me vendimin për heqjen e dënimit të përjetshëm të Dritan Dajtit, i akuzuar për vrasjen e 4 policëve, Rama u shpreh:
“Me Dritan Dajtin s’kam asnjë lidhje dhe asnjë kontakt dhe e vetmja gjë që më kujtohet mua ishte lidhja e tij me Berishën. Ne s’do lëmë gur pa luajtur që ky vendim të zhbëhet, do të bëjmë gjithçka që ky vendim të zhbëhet. Drejtësia e re po vjen”.
