Kryeministri Edi Rama ka hedhur hapin e parë për të bashkëpunuar me kreun e Partisë Demokratike, Lulzim Basha, pas betimit të Parlamentit të ri të dalë nga zgjedhjet parlamentare të 25 prillit në shtator. Gazeta e ka deklaruar se ndërkombëtarët e mbështesin një bashkëpunim mes PD dhe PS për të mirën e Shqipërisë dhe integrimit, ndërkohë edhe vetë kryesocialisti Rama e ka artikuluar një kërkesë të kësaj natyre.\
Por sinjali i parë ka ardhur dje, teksa Kuvendi i Shqipërisë ka vendosur që të hapë me vonesë garën për kreun e ri të Autoritetit të Mediave Audiovizive. Zgjedhja e kreut të ri të AMA u bë “mollë sherri” mes mazhorancës dhe opozitës, teksa kjo e fundit kërkoi që të pezullohet gara dhe se zgjedhja e anëtarëve të Autoritetit të Mediave Audiovizive, sipas saj, duhet të bëhet nga Parlamenti i ri.
Dhe si duket thirrja e PD-së është marrë në konsideratë nga PS-ja, pasi Parlamenti e ka hapur dje garën për kreun e ri të AMA. Përmes një njoftimi zyrtar, Kuvendi bën me dije se afati për paraqitjen e kandidaturave është 20 ditë dhe përfundon në fillim të korrikut.
“Rishpalljen e vendit vakant të Kryetarit të Autoritetit të Mediave Audiovizive; Çdo shtetas që plotëson kushtet e nenit 7 dhe 8 të ligjit nr. 97/2013 “Për Mediat Audiovizive në Republikën e Shqipërisë”, i ndryshuar”, mund të paraqitet si kandidat për Kryetar të AMA-s. Kërkesa paraqitet e shoqëruar me dokumentacionin përkatës që provon përmbushjen e kritereve ligjore për anëtar; Afati për paraqitjen e kandidaturave përfundon 20 ditë nga data e publikimit të këtij vendimi”, thuhet në njoftim.
Rama hedh hapin e parë për të bashkëpunuar me Bashën
Por nëse shikojmë me kujdes afatin e vendosur nga Kuvendi i Shqipërisë për paraqitjen dhe dorëzimin e dokumentacionit për kreun dhe 3 anëtarët e rinj të AMA, i bie që ai të mbyllet në fillim të korrikut. Mirëpo, në korrik mbyllet sesioni parlamentar dhe gjasat janë që kreu i ri i Autoritetit të Mediave Audiovizive dhe 3 anëtarët e këtij institucioni të votohen në shtator nga Parlamenti i ri.
Kjo do të thotë se hapja me vonesë e garës për kreun e AMA-s, i jep mundësi Kuvendit të ri që ta votojë. Kështu që me këtë shtyrje dhe me këtë strategji, gjasat janë që përzgjedhje e kreut të ri të AMA do të përdoret si trampolinë për të çuar kryetarin e PD, Lulzim Basha dhe kryeministrin Edi Rama drejt bashkëpunimit me njëri-tjetrin.
Balla tjetër ftesë PD për bashkëpunim
Megjithatë, dorën shtrirë për të bashkëpunuar me kryetarin e Partisë Demokratike, Lulzim Basha, dje e ka mbajtur edhe kreu i Grupit Parlamentar të Partisë Socialiste, Taulant Balla. Ky i fundit duke folur në një prononcim për mediat nga selia e PS, u shpreh i gatshëm për të bashkëpunuar me PD-në. “Frymë të re dhe komunikim të ri me opozitën.
Ne në shtator duhet që në legjislaturën e re të Kuvendit do kemi mundësi të krijojmë mundësi të reja komunikimi. Kemi dakordësi me PD, kujtoj disa reforma, edhe Basha mesa duket do rizgjidhet nesër, prapë do të ulemi në tavolinë që ti çojmë para reformat. Ditën që kur e zgjedh vetë kundërshtarin, atëherë shko diku tjetër. Në këtë fushë institucionale përballë PD është PS dhe grupi parlamentar. Kemi gjithë dëshirën për këto ura komunikimi”, deklaroi Balla.
