Avokati Spartak Ngjela me anë të një postimi në Facebook ka analizuar gjendjen e krizës politike që po kalon vendi dhe ka treguar faktorët që nuk e lënë presidentin Meta dhe ish kryeministrin Berisha të destabilizojnë vendin.
Postimi i Ngjelës:
Asgjë nuk mund t’i ndodhë më as Shqipërisë dhe as bashkimit kombëtar shqiptar, në të gjithë Ballkanin Perëndimor.
Presidenti serb Vuçiç po qahet kudo ku po shkon në Perëndim, por jo në Uashington: “po formohet Shqiperia e Madhe”, iu thotë Vuçiç si i vrarë shpirtërisht, se po dallon bashkimin kombëtar shqiptar në Ballkanin Perëndimor.
Po, ku e di sekretin e historisë së ardhshme miku i Ramës, Vuçiç! Se mos e di Rama!
l.
Lufta amerikane që u bë për Kosovën: ky është edhe sekreti i kësaj politike. Po pse, hajvanët e korruptuar të politikës së lartë shqiptare do ta kuptonin këtë! Është e pakuptueshme dhe e frikshme për ta. Prandaj po rendin sa në Beograd e në Moskë, që të mundin Amerikën në Shqipëri.
Asfare, asgjë nuk mund të bëjnë. Këta janë edhe hajvanë, por edhe të shitur, dhe duan edhe shkatërrimin e Shqiperisë.
“O djem rrëmbeni armët”, bërtiti Saliu si i ndërkryer e gjithë frikë para disa muajsh. Askush nuk ia vari. Të gjithë këtë mllef e kanë nga frika e SPAK-ut që po ngrihet kundër tyre. Dhe të gjithë shqiptarët po presin SPAK-un.
Pushtetarët e korruptuar urrejnë SPAK-un, kurse shqiptarët po presin SPAK-un me padurim – domethënë se shqiptarët urrejnë pushtetarët e korruptuar.
Kurse në Kosovë, korrupsioni është më i zbuluar, se është rrëzuar me votë para një muaji. Edhe atje funksionon një Gjykatë Speciale.
Po kryeministri i Shqipërisë, Edi Rama? Përgjigjia për të është shume e thjeshtë: qeveria që nuk ngjall besim në popull, duhet të largohet. Rama dhe qeveria e tij është i pabesueshëm: edhe për shqiptarët dhe për ndërkombëtarët.
Tani këta krerë politikë në Tiranë janë gjithashtu dhe krejt të pabesueshëm për politikën e bashkimit kombëtar. Prandaj duhet të shkojnë drejt penalitetit.
Bashkimi kombëtar është historia e re e Shqipërisë, kurse e vjetra korruptive po shkon drejt likuidimit: edhe në Shqipëri, edhe në Kosovë.
Dhe të gjithë këtë kohë mbarësie për shqiptarët e Ballkanit Perëndimor, e ka sjellë çlirimi i Kosovës.
ll.
Ky bashkim kombëtar është sot i garantuar. Por, a ka aktualisht pengesa?
Pengesat janë vetëm të korruptuarit në Tiranë, në Prishtinë dhe në Shkup që po shpresojnë te Beogradi.
Kurse disa injorantë të paguar në Prishtinë thonë se nuk e njohin Shqipërinë, “për ne – thonë këta – ka vetëm një shtet të Kosovës, dhe jo Shqipëri”; sepse ashtu mund të shkojë Kosova sërish nën Serbinë. Janë naivë të paguar nga Beogradi. Kush e di se që kur iu ka filluar rroga!
Korrupsionin shqiptar në Tiranë dhe në Prishtinë e bashkon krimi. Në fakt, Beogradi gjithmonë i ka blerë qeveritarët e korruptuar në Tiranë dhe në Prishtinë.
Këta janë në thelbin e tyre të korruptuarit e mëdhenj të Shqipërisë dhe ata të Kosovës, të cilët, pasi i vodhën shqiptarët, tani duan t’i shesin.
Por janë të humbur.
Ndërsa në Tiranë vijon çështja Meta. Të gjithë po habiten me mazhorancën: pse po e vonon shkarkimin e Metës!
Rama, kij kujdes! se është kohë me impuls kjo. Dhe, jo me një impuls dosido, por me impuls amerikan.
lll.
Edhe çështja Meta, pjesë e këtij fenomeni është, dhe në këtë fenomen hyn edhe Berisha. Të dy po duan destabilizimin e Shqipërisë, dhe këlthasin për armë. Por Meta na doli edhe si një sovranist antiamerikan. Komedia e dytë kjo e Shqipërisë: kryengritja e dytë fshatare që kërkon “babën”.
Pse, ky Meta do ta mundë të ardhmen e Shqipërisë, e cila është e futur brenda ombrellës amerikane? Nuk kupton fakiri që e ka krejt të pamundur ta mbajë gjënë e vjedhur. Do ta dorëzojë me gjithësej, sepse pastaj, ngec historia e pritshme e Shqipërisë
Por, jo vetëm ai, të gjithë këta të korruptuar lodhen kot, sepse nuk e kuptojnë dot që ndërkohë po i ndëshkon historia e pritshme e Shqipërisë.
Çdo të thotë “të të ndëshkojë historia e pritshme e Shqipërisë”? Në fakt ky nuk është koncept që ka dalë në Shqipëri.
Çdo komb apo çdo popull ndodhet ngaherë në një crucifix pericolos, në një udhëkryq të rrezikshëm. Ndodhur në këtë udhëkryq ky popull ose shpërbëhet, ose hyn në një rrugë të re të zhvillimit të tij. Të dyja gjasat quhen histori e pritshme.
Kjo është sot edhe historia e pritshme e Shqipërisë. Por, korrupsioni i lartë, me dëshirën për kryengritje dhe për armatosjen e popullit, ka dashur dhe po dëshiron shpërbërjen e Shqiperisë, që të garantojë gjënë e vjedhur. Turp më të madh se ky nuk mund të ketë.
I pari këtë metodë e zgjodhi Sali Berisha, kurse tani e ka marrë edhe Meta: kërkojnë destabilizimin e Shqipërisë me thirrjen “heroike” të shpëtimit të saj nga krimi, kur krimi janë vetë.
Asnjë shpëtim nuk kanë këta të korruptuar, vetëm po vonojnë shqiptart drejt pasurimit dhe shtetit ligjor. Meta, për ekspertizën perëndimore, e sidomos atë amerikane, konsiderohet një i korruptuar që nuk u bë dot diktator sepse nuk pati dot në drejtim një parti të madhe. Kurse Berisha është skeduar prej 20 vjetësh se përse luan.
Atëherë, çfarë duhet bërë me ta?
Vetëm SPAK e ka zgjidhjen: për të gjithë. Dhe ai po vjen këto ditë. Kurse mazhoranca nuk duhet të sillet vërdallë as për vënien në funksionim të SPAK-ut, dhe as për shkarkimin e Ilir Metës.
Çdo vonesë, është kundër Shqipërisë
