Nga Anri Bala
Nuk ka analist, gazetar, mentar pa mend, që nuk rri pa anatemuar Sali Berishën, se përse nuk largohet nga drejtimi i PD-së dhe nëse i ecën mbarë për të përmbysur ca halle që ka me drejtësinë, të haj dhe ca vite pension te majmë për “lodhjen dhe mundin” që ka bërë për Shqipërinë dhe shqiptarët, sikurse thotë vetë, saherë që del para çdo mikrofoni apo banaku televiziv.
Në fakt, thashethemet janë se Saliu do të largohet, por nuk po e lëshon Rama dhe kjo është si ajo barcaleta e policit që kishte kapur një hajdut por pa mallin e vjedhur dhe pasi e raporton në komisariat ata i thonë se nëse nuk e kanë kapur me presh në duar duhet ta lërë të lirë, por polici u përgjigjet: Atë desha të bëj, por nuk më lëshon hajduti tani, sepse nuk di nga të shkoi…ka humbur rrugën.
Kjo është e vërteta e hallit të Saliut, atë nuk e lëshon Rama të ik, madje fshehtas i premton të mos dëgjoi askënd dhe lutet për Berishën, që të jetoi sa më gjatë me këmbë e me dorë, duke i kursyer shumë mund dhe përpjekje për të drejtuar vendin, drejt fitores së zgjedhjeve të ardhshme… të sigurta dhe më “madhështore”.
Slogani “Shqipëria Madhështore”, nuk është gjë tjetër veçse një fabul ku dhelpra e shikon rrushin me shpresë që roja jo vetëm që nuk do e vras, por do i ndajnë bashkë bistakët. Kjo në fakt ka ndodhur dhe po ndodh.
Kullat e Zenit dhe mos prekja e pasurive të vëna nën pushtetin e Berishës, të familjarëve dhe bashkëpunëtorve, sipas DASH, nuk është përrallë por një realitet turpërues, që e shikon çdo shqiptar dhe jo më SPAK-u, që të shikon edhe mendjen si në rastin e Veliajt me apartamentin e AgiCons, që sipas Dumanit dhe Dados “ka shfaqur interes për ta blerë”… dhe e ka blerë sepse e ka menduar.
Një gjë është e sigurtë, se syleshë nuk na bënë dot as SPAK e as Berisha me Ramën, sepse tashmë “qemanes” së Nastradinit i’a kemi dëgjuar avazin. Berisha është “kanakari” i SPAK, që përdoret për medalje dhe Rama kur themi Rama qeveritarët e tij antikrim, antikorrupsion, doganier apo tatimor të tij, kurrë nuk kanë shkruar as dy gishta letër për ish kolegët e tyre të qeverisë së babëzisë së Sali Berishës dhe Ilir Metës, duke u dhënë medaljen e “ndershmërisë dhe përkushtimit” ndaj atdheut, me vulën e heshtjes brilante të drejtësisë së re…mbushur me me rrangulla të drejtësisë së vjetër.
Mos qeshni se është për të qarë, Saliu ka pazar të lartë dhe është Edi Rama që mban dhe nuk e lëshon për të patur të sigurtë të ardhmen e tij, madje për ta përdorur si kavie në një eksperiment pa labarator, se…. çfarë do ndodhte me vetë Ramën, kur ai të bëhet një Sali, sepse vjen një ditë dhe faktori kohë është i pandalshëm./Ekskluzive.al
