Kryeministri Edi Rama zgjodhi mbledhjen e grupit parlamentar socialist për të sulmuar presidentin Ilir Meta.
Ky i fundit prej disa kohësh ka nisur një ofensivë ndaj mazhorancës qeverisëse, ndërkohë që dje i pari i qeverisë shqiptare zgjodhi që një pjesë të fjalimit të tij të shkurtër para deputetëve të Partisë Socialiste t’ia kushtonte pikërisht presidentit Meta.
Ditën e djeshme siç është bërë tashmë traditë çdo fillim jave, kryesocialisti Rama zhvilloi një mbledhje me drejtuesit politikë të qarqeve, ndërsa më pas zhvilloi një mbledhje me grupin parlamentar. Gazeta ka mësuar se në fokus të këtyre takimeve ka qenë ndarja e detyrave për fushatën elektorale sa u takon zgjedhjeve parlamentare të 25 prillit.
Rama akuza Metës
Por që të marrësh një mandat të tretë qeverisës, duhet patjetër shumë punë dhe për këtë arsye mësohet se kryeministri Rama ka kërkuar angazhim nga të gjithë, në mënyrë që të dielën e 25 prillit shumica e votave të qytetarëve të shkojnë në hambarin e PS dhe rrjedhimisht t’i japin kësaj partie shumicën e mandateve të deputetëve dhe të drejtën për të formuar qeverinë e mandej për të qeverisur për katër vitet e ardhshme Shqipërinë.
Kështu sipas informacioneve, mësohet se zoti Rama ka porositur deputetët socialistë që të bëjnë sytë katër, pasi ka informacioneve se edhe presidenti Ilir Meta po luan shumë fort në prapaskenë, duke bërë fushatë në mbështetje të Lëvizjes Socialiste për Integrim. Në këtë pikë, mësohet se shefi i Partisë Socialiste ka bërë me dije para grupit parlamentar se kreu i shtetit po infiltron njerëz të tij në PS për të krijuar puçe para zgjedhjeve.
Po ashtu Rama ka deklaruar se Meta po bashkëpunon me gjyqtarë e prokurorë të shkarkuar nga vetingu, duke iu kërkuar që ta ndihmojnë për rrëzimin e qeverisë. Kështu që i ndodhur para kësaj situate, mësohet se kryeministri Rama ka kërkuar që të gjithë kandidatët që do të propozohen për deputetë nën siglën e Partisë Socialiste të kalojnë në skaner, për të shmangur surpriza që ndonjë që u është bashkuar socialistëve, në të vërtetë është njeri i “Metës”.
Po ashtu, mësohet se Rama ka kërkuar që të gjithë të punojnë fort për të siguruar një vend në formacionin e skuadrës së PS në zgjedhjet e 25 prillit, ndërsa ka zbuluar edhe faktin tjetër se presidenti Meta përveçse po përdor të ngelurit në veting, po përfshin edhe subjekte të Operacionit Forca e Ligjit, për të mbledhur vota për LSI.
Rama këmbëngul te shkrirja e LSI
Megjithatë, pavarësisht përfshirjes së presidentit Ilir Meta në fushatë për Lëvizjen Socialiste për Integrim, mësohet se kryeministri Edi Rama ka kërkuar që të vijohet e madje të çohet përpara projekti i tij për të shkrirë LSI-në.
Mësohet se Rama ka qenë i prerë dhe ka porositur deputetët që të punojnë shumë fort, për t’i marrë sa më shumë militantë partisë së Kryemadhit, eksod i cili do të sillte automatikisht edhe rrudhjen e Lëvizjes Socialiste për Integrim. Nga ana tjetër mësohet se kryesocialisti Rama ka paralajmëruar të vetët se ai e ka listën gati të kandidatëve për deputetë dhe se nuk po e zbulon, për të vetmen arsye, pasi kërkon që të gjithë të punojnë për të arritur që të fitojnë të drejtën për të garuar nën siglën e Partisë Socialiste në zgjedhjet e fund prillit.
Ndërkohë, sipas të njëjtave burime, mësohet se kryeministri Rama ua bëri të qartë edhe pritshmëritë e tij deputetëve, se synojnë 75 mandate në këto zgjedhje, e cila sipas tij, arrihet vetëm me punë nga të gjithë dhe nëse PS do të çojë në hambarin e saj plot 800 mijë vota.
