Edi Rama ka vënë ditën e djeshme kushtet e para për vetingun në politikë. Duke folur në Parlament, Rama e bëri të qartë se do të refuzojë nismën e Partisë Demokratike nëse qëllimi i saj është ndëshkimi i ish-kryeministrit Sali Berisha.
Ka shumë të dhëna që thonë se vetingu në politikë do të godasë të parin ish-kryeministrin, por Rama duket se i ka dalë në mbrojtje. Sipas tij, Partia Socialiste nuk mund të kthehet në kamerdare për kreun e Partisë Demokratike. Kreu i qeverisë gjatë seancës së djeshme ka pasur një sërë debatesh të forta me kreun e PD ku nuk kanë munguar akuzat e sulmet ndaj njëri-tjetrit. “Reciton abetaren që të ka mësuar llumi.
Trego që nuk je dhe mos shpif si llumi. Shkurt muhabeti mos ji karikatura e tij. Ti ke sfidën më të madhe, se megjithëse ai llum të ngjiti në krye, ti je diçka tjetër. Ti duhet të Rilindësh. Na dëgjo. Flit me fakte. Nëse hyj në garë unë me Ferdinandin kush ka më shumë kritika për Durrësin, e fitoj garën.
I referohem fakteve. Kjo është opozita. Si do i bënit ju këto? Nëse më thua që plehrat do i lënë rrugëve nuk jam dakord me ty? Nuk është kjo alternativa. As të përdoresh burime pa i lexuar. Mblidh burimet. Shtrëngohu. Unë e kuptoj se ku e ke hallin për Vettingun. Megjithatë dua të diskutoj. Nëse na del që është shpëtimtare, nëse na rezulton se është kamerdare në formë peshkaqeni atëherë do të themi: Lulëzim bëj rolin e peshkaqenit që të mbrohesh nga peshkaqeni i Foltores. Por thjesht ta ndajmë këtë. Çdo gjë që i shërben vendit është pro. Çdo gjë që mban era foltore ne na keni kundër”, tha ai.
Rama-Bashës: Nëse PD ka llum, ty ai llum të ka mbajtur
Teksa kreu demokrat, Lulzim Basha përmendi një fitore të tij duke deklaruar se e kishte kafshuar kryeministrin, Rama reagoi ashpër. Ai u shpreh se dialogu mes PS dhe PD duhet respektuar dhe nëse vazhdohet me këtë gjuhë ai do të ndërpritet. Rama tha se Basha ka kafshuar edhe ata që dikur i ka patur aleatë duke iu referuar kështu LSI-së dhe marrëdhënieve që janë krisur. Kreu i qeverisë ia bëri të qartë Bashës se nuk do të mund të arrijë asgjë duke dhënë urdhra dhe ultimatume. Sipas tij, Basha nuk mund të flasë për njerëz kur futet në selinë e tij nga pas sepse nga para ka njerëz të foltores.
“Dialogun mes palëve të PS e PD, bën mirë shumë t’i respektosh, nëse nuk do që ta ndërpresim përfundimisht këtë mënyrë komunikimi, e jo të guxosh të nxjerrësh nga goja ato që nxjerr ti, se shkon deri te kafshimet tani, se ke qenë dhe aleat me atë që kafshon ti. Ca janë këto që po bën, je në orën 12 të drekës, zgjohu. E di nga e ke, me aleatin që ke pasur në krah, me kafshime në vesh e qafë, por mos na bëjë qesharakë të gjithëve këtu.
Nëse mendon ti se do bësh këtu nisma me ultimatume, nga kjo selia këtu afër, harroje. Nuk mund të flasësh ti për njerëzit, kur edhe në selinë tënde futesh nga mbrapa, nuk futesh dot nga para ditën, se ka njerëz aty dhe nuk e di çfarë foltoreje të shfaqet”, u shpreh ai.
Lidhur me deklaratat e kryedemokratit për të larguar llumin e partisë, kryeministri tha se ai llum e ka mbajtur atë. Sipas tij, Basha është pjellë brilante e këtij llumi, por tani nuk duhet të jetë më, por duhet të rilindë. “Ke dalë tani me një tezë se edhe PD ka pjesën e vet të llumit. Por nëse PD ka llum, ty ai llum të ka mbajtur mor Lulzim.
Ti je pjella më brilante e atij llumi. Unë nuk kam ç’i mbaj me gajret foltores. Mos na i sill këtu këto çështje. Të kam dashur, të dua dhe do të dua por nuk kam si të ndihmoj këtë herë. Mos ji karikatura e llumit. Ti duhet të rilindësh. Na dëgjo ki besim dhe ndërvepro këtu me gjuhën e fakteve. Ka plot fakte”, tha Rama./SOT
