Kryeministri Edi Rama ka zbardhur ditën e djeshme planin për javën e ardhshme, ku ka bërë me dije se gjithçka do të jetë e hapur përveç autobusëve, aktiviteteve sportive dhe kulturore. Duke folur LIVE në rrjetet sociale, kryeministrit Rama bëri me dije se masat do të liberalizohen në të gjithë vendin duke nisur që nga e hëna, me hapjen e bareve dhe restoranteve. Sakaq nga data 1 qershor do të hapen çerdhet.
Rama bëri thirrje se qeveria do të liberalizojë masat, por qytetarët nuk duhet të harrojnë masat, pasi situata mund të ndryshojë si pasojë e neglizhencës, duke e kthyer një zonë të gjelbër në zonë të kuqe, ashtu sikurse mund të ndryshojë pozitivisht nëse qytetarët tregohen të kujdesshëm, pra një zonë e kuqe mund të kthehet në zonë jeshile. “Vijoj të lexoj sojin e papërgjegjshëm, që ky është grip, që kjo është kot, nuk ka asgjë, njëri sot, shkruante se po tani, po bëhet për protestat. Këto broçkulla ju lutem t’i lëmë, t’i referohemi shkencës dhe burimeve zyrtare të informacionit. Të mos merremi me llafe, që janë hapur të gjithë. Ne nga e hëna përveç transportit publik, aktiviteteve sportive dhe kulturore në mjedise të mbyllura nuk do të ketë asgjë mbyllur. Hiq transportin publik, që është problemi i madh në këto kushte, por nuk e hapim ende.
Hiq edhe baret dhe restorantet në mjedise të mbyllura, palestra, teatro, kinema, club-e nate apo lokale lodrash për fëmijë, gjithçka tjetër do të jetë e hapur. Ekspozimi do të jetë shumë i madh, sidomos me baret dhe restorantet. Ju e dini si janë kushtet në furgona dhe autobusë është si të vendosësh autobusë dhe fugona në dispozicion të virusit. Po punojmë për një strategji, që është edhe një reformë në transportin publik. Durim se ende nuk jemi aty, është problem i madh”, u shpreh Rama.
Procedimi me plazhet
Kryeministri sqaroi edhe mënyrën se si do të procedohet me plazhet. Në një komunikim LIVE në Facebook me qytetarët, Rama bëri me dije se këtë verë do të ketë më shumë plazhe publike se private. Rama thekoi se qeveria do të tregohet strikte në këtë pjesë. Këtë vit plazhi do të jetë ndryshe, pra pushuesit do mund të kalojnë pushimet me çadrën e tyre. “Plazhet këtë vit do të jenë shumë më tepër publike se private. Do të jemi shumë strikt me këtë, kjo e keqe do vijë me të mirën, që do ketë më shumë hapësirë për shqiptarët pa iu dalë përpara një njeri me hu në dorë që kjo është “ronë e nxanun”. Por duke zgjedhur hapësirën në plazhin publik.
Patjetër që ku ka hotele do ketë plazhe private, aty ku janë plazhe të populluara do gjendjet një zgjidhje. Plazh pa salltanete të mëdha, pa ata shezlongët që s’të lënë të shohësh as rërën dhe të kalosh në fije të perit mbi trupat e njerëzve”, tha Rama.
Ja si do procedohet në zonat e kuqe
Më tej, kryeministri ka sqaruar edhe pikëpyetjet në lidhje me fashat orare në zonat e kuqe, dhe u shpreh se e gjitha kjo bëhet për të dekurajuar lëvizjet e kota. “Do të mbetemi besnikë të numrave në përcaktimin e zonave të gjelbra. Komiteti i ekspertëve sheh numrat dhe modeli i zonave të kuqe nuk bazohet vetëm të numrat, por dhe të shumë të tjera. Nuk është çudi që një zonë e gjelbër të rikthehet e kuqe, por edhe e kundërta. Pak hapemi, se këto numra janë prodhuar nga ndikimet e 10-12 ditëve të fundit, jo të 5-6 ditëve të fundit. Pak hapemi dhe numrat fillojnë të rriten. Kjo është reale, nuk është një lojë, një farsë. Në kushtet e zonës së kuqe do vazhdojmë të kemi kufizime. Më pyesin pse mbahen fashat e orarit… Ato kanë rol në dekurajimin e daljeve të tepërta që nuk janë të domosdoshme. Nëse nuk kemi fashën orare, i bie që në një zonë të kuqe si në një zonë të gjelbër, baret të jenë hapur. Kufizimi i daljeve në fundjavë është dashur dhe duhet për këtë”, tha Rama.