Shengeni Ballkanik ka thelluar përplasjet mes shefit të qeverisë shqiptare dhe atij kosovare. Që në krye të herës, kur plasi debati për Shengenin Ballkanik, u vu re një përplasje mes kryeministrit të Kosovës Ramush Haradinaj dhe kryeministrit Edi Rama. E gjithë kjo përplasje dhe mospajtim nga të dyja palët ka ardhur si pasojë e përfshirjes së një pale të tretë në këtë proces, që është Serbia.
Të gjithë e dinë raportin e Kosovës me Serbinë dhe kjo ka bërë që Kosova të ketë një qëndrim të akullt dhe të prerë ndaj këtij bashkëpunimi. Në deklaratat e krerëve kosovarë është vënë re se ata nuk e hedhin poshtë miqësinë dhe dashamirësinë për Shqipërinë dhe qeverinë shqiptare, por nga ana tjetër bëjnë të qartë distancimin e tyre nga Serbia. Sakaq ditën e djeshme Haradinaj ka shpërthyer në sulme për taksën në rrugën e Kombit si edhe për çështjen e ndryshimit të kufijve. Në një intervistë për gazetën kosovare “Epoka e re”, Haradinaj ka thënë se i vjen keq prej shqiptarëve që kryeministrat e këtyre dy vendeve po përplasën në distancë. Shefi i qeverisë së Kosovës, ka sqaruar se kur pozicionohet për çështje nacionale nuk e bën këtë për inat apo për hatër të dikujt tjetër. “Krejt shqiptarët, pavarësisht feve, krahinave, partive politike, jemi vëllezër e motra. Ne jemi një. Por, për interesa nacionale nuk kam qare pa u pozicionuar.
Dhe kur pozicionohem nuk e bëj për inat të njërit apo për hatër të njërit, sepse për interes nacional janë vrarë Shkëlzeni, Luani dhe familja ime i ka kaluar ato që i ka përjetuar. Kur kam dalë kundër ndarjes dhe kundër asaj se “Trepça” t’i mbetet Serbisë, nuk mërzitem se kush hidhërohet. Aty është burimi i ndasive që kemi. U kërkojmë falje të gjithë shqiptarëve që i mërzisim tash me këtë gjuhë që përdoret”, ka thënë Haradinaj. Kryeministri në detyrë i Kosovës në prononcimin e tij të dhënë për këtë gazetë, ka kritikuar qeverinë e Shqipërisë, që i ka sjellë pengesa dy ekonomive në momentin që Kosova ka vendosur taksën prej 100 për qind për produktet serbe. Sipas Haradinajt, Shqipëria është dashur ta marrë tregun e Kosovës dhe jo të vendosë taksë. “Më dhimbsen shqiptarët e Shqipërisë, vëllezërit e motrat e jugut, sepse ne kur i kemi vendosur taksë Serbisë është dashur që Shqipëria ta fitojë tregun në Kosovë. Kur Kosova iu heq si treg Serbisë, në vend se Shqipëria ta marrë këtë treg, shqiptarët mes vete kanë vendosur taksë në rrugë, e cila është 42 euro për kamion e 5 euro për makinë. Pra, ne kemi vendosur bllokadë që mos me u lidh këto ekonomi”, ka deklaruar Haradinaj.
Përplasjet Rama-Haradinaj
Edhe më herët dy kryeministrat janë përplasur sa i takon Shengenit Ballkanik. Kryeministri Rama e ka cilësuar Haradinajn si një gënjeshtar, pasi ky i fundit bëri një deklaratë për pjesën e taksës së Kosovës të vendosur ndaj Serbisë. Haradinaj deklaroi se ajo që Serbia po synon të arrijë përmes këtij procesi, është heqja e taksës të vendosur nga Kosova. Nisur së andejmi Rama e ka sulmuar Haradinajn ashpër në deklaratat e tij, duke i lënë shkas këtij të fundit që të vijojë thellimin e përplasjeve. Sakaq Rama në deklaratën e tij tha se këto reagime të Haradinajt vijnë si pasojë e paditurisë së këtij të fundit. Kësisoj nisur nga këto deklarata, Rama ka sulmuar Haradinajn duke e cilësuar edhe si injorant politikisht. “Një ndërhyrje prej një të padituri klasik. Si bëhet kjo? Unë po them që nuk ka asnjë nyje detyruese. Haradinaj është një gënjeshtar që ka gënjyer përsëri. Gënjen nga padija apo me qëllim nuk kam arritur ta zbuloj. Por është një gënjeshtar. Kjo nismë ka thjesht një qëllim të zbatojë marrëveshjet mes të gjitha vendeve. Unë dua që në këtë proces të fusim edhe elementë të tjerë”, ka deklaruar Rama. /Arbjona ÇIBUKU
