Shqipëria ka ndërmarrë përsipër të reformojë sistemin zgjedhor, por ndërkombëtarët shprehen të shqetësuar për zvarritjen e këtij procesi. Për këtë arsye dy bashkëkryetarët e Komisionit të Posaçëm të Reformës Zgjedhore, Oerd Bylykbashi nga Partia Demokratike dhe Bledi Çuçi nga Partia Socialiste raportuan dje për punën e bërë nga ky komision deri më tani në këtë drejtim. Deri në këto momente komisioni është mbledhur vetëm katër herë për të punuar për reformën zgjedhore dhe për të qenë në kontakt me ecurinë e saj, Prezenca e OSBE në Tiranë zhvilloi dje një takim.
Madje kryetari i Prezencës së OSBE, Bernd Borchard u shpreh se komisioni duhet të fillojë menjëherë nga puna për të trajtuar shqetësimin për blerjen e votës. “Sikurse u theksua nga ODIHR-i në raportin e 2017-s, Komisioni duhet t’i japë përparësi punës për të adresuar çështjet e vazhdueshme të blerjes së votës. Akuzat e shumta për blerje vote kanë cenuar besimin e publikut dhe nevojitet vullnet politik për t’iu kundërvënë këtij fenomeni.
Ne po u kushtojmë vëmendje të veçantë rasteve të shkeljeve zgjedhore të denoncuara në Prokurori. Tri çështjet që kanë shkuar në gjykatë deri tani janë një fillim, por vetëm një fillim”, tha kryetari i Prezencës së OSBE. Bernd Borchard tha se duhet të pasqyrohen rekomandimet e ODHIR.
Rrëzohet propozimi i PD
Ndër të tjera gjatë fjalës së tij, Bernd Borchard i kushtoi një vëmendje të veçantë edhe propozimit të Partisë Demokratike për të futur elektronikën në zgjedhje. Sipas tij, teknologjia nuk duhet të vendoset menjëherë në zbatim, por propozoi që më parë projekti të pilotohet në disa zona në zgjedhjet vendore të vitit 2019. “Lidhur me një çështje tjetër të madhe, teknologjitë e reja të votimit, praktikat më të mira tregojnë se vendimet për përdorimin e teknologjive të reja nuk duhet të vihen menjëherë në zbatim në zgjedhjet e radhës, por, më parë, duhen testuar.
Ne kemi sugjeruar në vijimësi që të bëhet një testim në një numër të kufizuar zonash, gjatë zgjedhjeve vendore të vitit 2019. Edhe për këtë testim të kufizuar, nevojitet kohë për të realizuar studimet e fizibilitetit, testimin, pilotimin, ndërtimin e besimit të publikut, edukimin e zgjedhësve dhe trajnimin e zyrtarëve zgjedhorë”, vijoi më tej kryetari i Prezencës së OSBE.
Përmes kësaj deklarate, Borchard rrëzoi PD, e cila ka theksuar vazhdimisht se për ta është prioritet përdorimi i teknologjisë në procesin zgjedhor. Nga ana tjetër, Bernd Borchard shtoi se votimi elektronik mund të pakësojë disa rreziqe për zgjedhjet, por krijon rreziqe të reja, ku përmendi rrezikun e hakerave, nëse bëhet online. Ndërsa votimin e emigrantëve Borchard e cilësoi si një sfidë të madhe sepse duhet gjetur balanca ndërmjet sigurimit të të drejtës së votës për shtetasit që jetojnë jashtë Shqipërisë dhe garantimit të paprekshmërisë dhe sigurisë së votës. “Nuk duhet të ekzistojë asnjë mënyrë që të bëhet lidhja e individit me votën e tij, pasi ka kryer votimin. Për këtë kërkohet një sistem disi i ndërlikuar”, tha ai./Sot
