Ndonëse puna ka ecur me ritme të ngadalta, mazhoranca synon që diskutimet me PD dhe LSI për reformën zgjedhore ti mbyllë brenda muajit maj. Bashkëkryetari i Komisionit të Reformës Damian Gjiknuri, në një intervistë për Report tv tha se puna më pas duhet të vazhdojë në komisionin e posaçëm parlamentar.
“Synimi është që brenda majit ne të mbyllim gjithë procesin e konsultimit politik për të gjetur të gjitha marrëveshjet e nevojshme. Besoj se qershori është mëse i majftueshëm për të ndjekur procedurat në komisionin e reformës zgjedhore dhe më pas në Kuvendin e Shqipërisë”, shprehet Gjiknuri.
Kushti i panegociueshëm i PD për qeveri transitore nuk do të merret në konsideratë nga mazhoranca.
“Nuk mund të negociohet me parimin që të quhet e pranuar dua të asgjësohet ai që dialogun me mua. Kjo është një çështje që e ka gjetur përgjigjen e saj që te dështimi i protestave të rrugës dhe përgjigja për këtë është dhënë me kohë. Nuk besoj se qeveria teknike është zgjidhja. Dua të qëndroj strikt të puna e komisionit zgjedhor”, tha Gjiknuri.
Cili do të jetë fokusi i mbledhjes online të hënën?
“Kemi akoma dy çështje të pa trajtuara, problemin e reformës së sistemit zgjedhor, propozimet që ka sjellë opozita jashtë parlamentit dhe si kërkojmë të adresojmë disa probleme të mbetura dhe për këtë duhet të biem dakord të vazhdojmë përpara duke përfshirë ekspertizën e ODHIR”, u shpreh Gjiknuri.
Që prej datës 10 mars puna e tryezës së reformës zgjedhore ndaloi për shkak të pandemisë teksa afati për realizimin e zgjedhores ishte data 15 mars. Afati i ri që synohet për të realizuar këtë reformë është muaji qershor.
