Rëndohet gjendja depresive e presidentit Ilir Meta. Ky i fundit prej një viti ka treguar se nuk është mirë “mendërisht” për shkak se ka dalë nga statusi i Presidentit të Republikës dhe sulmon këdo që i del përpara, qoftë kjo reforma në drejtësi, qeveria dhe ndërkombëtarët, me një gjuhë që nuk i ka hije një kreu shteti.
Kulmi i veprimeve të tij arritën kur ai anuloi zgjedhjet vendore të 30 qershorit të një viti më parë dhe më pas gjatë tubimit të 2 marsit kundër qeverisë, kur paralajmëroi se nëse mazhoranca qeverisëse nuk do të reflektonte, ai do të hynte bashkë me qytetarët në Kuvendin e Shqipërisë.
Por ditën e djeshme presidenti Meta ka shkuar më larg me kërcënimet e tij, teksa përmes një statusi në rrjetet sociale bëri thirrje për revolucion, si e vetmja mënyrë për të rrëzuar qeverinë.
Meta ngriti shqetësimin se sot pushteti i katërt është nën presion të vazhdueshëm, ndërsa kërkoi krijimin e një media të re për të përmbysur qeverinë “Rama”, e cila sipas tij, është e keqja e Shqipërisë. Madje, sipas kreut të shtetit, tek kjo media që duhet të lindë do të punojnë të gjithë gazetarët e kërcënuar nga pushteti, ndërkohë që ripërsëriti thirrjen se ka ardhur koha për përmbysjen e këtij regjimi brutal. “Dua sot të shpreh solidaritetin më të fortë me të gjithë gazetarët që janë në një presion brutal nga të gjitha drejtimet për shkak të tmerrit nga raportimi i të vërtetave të tyre në publik.
Tmerri nga fjala e lirë dhe pasqyrimi i së vërtetës është tipari kryesor i regjimeve kriminale që nuk e bazojnë qeverisjen mbi votën e lirë dhe fjalën e lirë, por në mbajtjen të shtypur dhe të frikësuar të popullit të tyre. Asgjë nuk e ndal ndryshimin! Madje koha e ndryshimit ka kaluar prej 4 vitesh. Tani ka ardhur kohë tjetër. Ju lutem gazetarëve të më njoftojnë që kur të gjithë pronarët e tyre të dorëzohen para presioneve të pushtetit, të themelojmë sëbashku një media transparente që ta nisë kohën e re me përmbysjen e këtij regjimi të neveritshëm mediatik që turpëron çdo njeri me minimum dinjiteti”, deklaroi ai.
Meta akuza e sulme ndaj mazhorancës
Por nuk ndalet me kaq, pasi në statusin e tij që shigjeton të gjithë mazhorancën socialiste, presidenti Ilir Meta ka inkurajuar ata që duhet t’i bashkohen kauzës, duke cituar një poet, i cili u pushkatua në kohën e regjimit komunist. Në këtë kontekst, kreu i shtetit akuzoi mazhorancën se ka si kryefjalë vetëm presionet dhe shantazhet, ndërsa theksoi se ky bashkim i madh njerëzor duhet të përqendrohet tek ndërtimi i kësaj media të re, e cila sipas tij, do të demaskojë qeverinë.
“Mos u dorëzoni para presioneve të pushtetit dhe pronarëve! Kujtoni poezinë e Havzi Nelës dhe do i qëndroni misionit tuaj fisnik në shërbim të të vërtetave dhe popullit shqiptar që meriton të rimarrë në dorë fatet e tij. Si president, por edhe si qytetar, jam sot me gazetaren Beti Njuma dhe familjen e saj të lënduar nga rrugaçëria e një pushteti të pacipë dhe brutal, por edhe me të gjithë kolegët e saj të cilët shantazhohen çdo moment.
Çdo shqiptar që do një media në shërbim të së vërtetës do jetë aksioner! Dhe bordi drejtues do jetë i përberë vetëm nga gazetarë kurajozë të cilët janë shantazhuar, kërcënuar dhe lënë pa punë nga regjimi”, nënvizoi ai. Ndërkohë kujtojmë që presidenti Ilir Meta edhe pak ditë më parë bëri thirrje për revolucion, duke kujtuar poetin e pushkatuar Havzi Nela, i cili sipas opozitës, u ekzekutua asokohe me urdhër të babait të kryeministrit Edi Rama.
Madje, mes të tjerash Meta shprehet se vargjet e poezisë së Havzi Nelës edhe sot gjëmojnë me një forcë të jashtëzakonshme për të realizuar ëndrrën e çdo shqiptari për një Shqipëri si gjithë Europa. Sipas tij, se komunizmi nuk do të mundë kurrë që të vrasë demokracinë, dinjitetin dhe të drejtat e njeriut, duke i çuar kështu një paralajmërim shefit të qeverisë.
