Dekretimi, çdekretimi dhe sërish dekretimi i datës së zgjedhjeve, çdo ditë e më shumë po kthehen në një melodi tallavaje të cilat të japin ndjesinë e një miksazhi erë qoftesh, bërxollash së bashku me këtë melodi të përçudnuar.
Nëse hap derën nga vjen kjo muzikë dhe aromë mezerie shikon në mes të lokalit një tavolinë me katër personazhe të zhgrryer në yndyrnat e mishrave dhe muzikës eksituese, të cilët ulërasin me duar e me këmbë nën efektin e një birre të njohur korçare.
Mareshalli i veshur shik me facoletën vënë ne xhepin e xhaketës, Likja i stiluar nga bashkëshortja me xhaketën në ngjyrë kopjativi , Mona e veshur si Esmaja këngëtarja e famshme e muzikës rome jugosllave dhe Luli i vobektë, i veshur si komsomolas i vogël, janë duke projektuar revolucionin e ardhshëm antiamerikë dhe antiramë.
Të katërt janë hedhur në sulm. Ju ka ikur pushteti, benefitet që vijnë nga ai, por dhe pasuritë e vëna lehtësisht gjatë vite të tëra qeverisje. Të gjithë në hall, të gjithë të revoltuar si kurrë ndonjëherë ulërasin me ofshamë për situatën e re të krijuar nga ndërhyrja amerikane.
SPAK, Byroja Hetimore, Gjykata Speciale, Gjykatë Kushtetuese dhe e Lartë nga e para dhe qindra gjyqtarë super të korruptuar që bien çdo ditë nga strukturat e katarsisit të Vetingut.
Halli i madh ka zënë Saliun dhe Liken. të pasuruar në mënyrë marramendëse me miliarda lekë pasuri, të zhytur në jetesë luksi të paimagjinueshme, si rezultat i mëkateve të tyre me pushtetin kërkojnë më çdo kusht kaosin.
Kaos në zgjedhje, kaos në ekonomi, kaos në politikë duke shkelur çdo rregull demokratik. Presidenti Like me njërën dorë në kobure për të vrarë veten si Aliende dhe me dorën tjetër në dekrete antikushtetuese është përçudnuar si personazh, duke dalë në një rol të paparashikuar deri më sot, atë të antiamerikanit.
“SHBA të shkojnë në Korenë e Veriut, këtu jam unë”, deklaron Ilir Meta.
Nuk paska qenë aq humoristike idea e tij për të imituar Alienden.
Ilir Meta është burrë, ai mund të imitojë dhe Norriegën. Ka qenë djalë trim, i besës, burrëror dhe nuk ka tradhëtuar asnjëherë miqtë e tij dhe duke pasur këto vlera ai mund të sulmojë njëherësh SHBA, BE dhe gjithë koalicionin demokratik botëror.
Pse jo ?
Ky djalë ka hipur mbi tavolinën e Jozefina Topallit, se ka për gjë ti dalë perballe tankeve të armiqve imagjinarë të jashtëm e të brendshëm, sikurse Vojo Kushi.
E quajnë Ilir Meta dhe është nga Skrapari dhe në gjakun e tij rrjedh trimëria shekullore e miteve të eposit shqiptar.
Fatkeqësisht imagjinata bie dhe kthehemi në mejhanen e tallavasë me qoftet korça dhe alkoolit të birrës korçare. të katërt vazhdojnë të kutërbojnë era alkol, era mish, era qofte dhe era frikë.
Të katërt janë në atë fazë që po bërtasin:” çfarë ere ka gjaku se jemi plagosur”. Gjithë ky revolucion i ndërmarrrë nga një tufë parazitësh, delirantësh është një realitet virtual që nuk ekziston. Shpërthime presionesh psikologjike për të trembur amerikanët, europianët, kryeministrin, se “po deshëm ne bëjmë qametin”.Jua kanë kuptuar hilen i lanë në hall të tyre dhe europianët dhe amerikanët. Reforma vazhdon.
Janë në ditën më mjerane të tyre. Qameti ka ardhur për ata. Për vilat e tyre në Lalëz, në Farkë, në Dhërmi, në Londër apo dhe në vendet afrikane.
Pas 30 qershorit vjen erë e re. Ngrihet Gjykata Kushtetuese, ngrihet SPAKU, ngrihet Gjykata e Lartë dhe shumë e shumë institucione të tjera, të cilat në bashkëpunim me strukturat amerikane dhe europiane kanë mbyllur qarkun dhe i kanë hartuar listat e mëkatarëve.
Muzika e tallavasë dhe birra korçare do ju a forcojë dhe ca ditë trurin. Fatkeqësisht kjo verë është shumë e nxehtë. Pas 30 qershorit, shqiptarët do freskojnë trurin në det për të harruar këtë grahmë pijanecësh ordinerë të cilëve kur tu ketë dalë pija do ndjejnë se kanë qenë në ëndërr, ndërkohë që ujku i ha pak e nga pak.
Art Bora
