Ndizet beteja e ish-Kryeprokurorit Adriatik Llalla me kolegët e tij në SPAK. Pas kërkesës për të hequr gjykimin e shkurtuar, tashmë procesi do të ndjekë rrugën normale dhe dje janë dhënë sinjalet e para se Llalla e ka marrë vetë në dorë situatën, duke mos u besuar më avokatëve.
Dje u mbajt seanca e radhës ku Llalla vendosi ta përfaqësojë personalisht veten, ndërkohë që si ai ashtu dhe prokurori i çështjes kanë kërkuar nga gjykata që të administrohen prova të reja në proces. Gjykata vendosi të pranojë kërkesat e palëve dhe tashmë si Llalla ashtu dhe SPAK do të dorëzojnë prova dhe fashikuj hetimorë shtesë mbi akuzën e fshehjes dhe mosdeklarimit të pasurive.
Po ashtu palët do të kërkojnë thirrjen e dëshmitarëve për një sërë çështjesh që kanë të bëjnë me pasurinë e ish-kryeprokurorit. Llalla ka blerë dhe ka shitur shumë prona e për këtë arsye pritet që në seancat e mëpasshme të thirren të gjithë ata që kanë shitur apo blerë pasuri nga Llalla. Ndërkohë amerikanët vijojnë të monitorojnë me shumë kujdes procesin, pasi e kanë bërë të qartë se ish-kryeprokurori duhet të ndëshkohet.
Pingpongu me dosjet dhe akuzat
Prokuroria fillimisht ngriti disa akuza ndaj ish-Kryeprokurorit: Fshehje pasurie, shpërdorim detyre, mosdeklarim të parave në kufi dhe pastrim parash. Por pasi dosja u transferua nga Krimet e Rënda te Prokuroria e Posaçme, kjo e fundit ia rrëzoi 3 akuzat e fundit dhe tashmë ai ka shkuar për gjykim vetëm për fshehje pasurie, vepër penale që dënohet me gjobë ose burgim deri në 3 vjet.
Ndërkohë në momentin që gjykata kaloi dosjen për gjykim, vendosi që të hiqej sekuestroja e 5 pasurive të Llallës. Ndërkohë Apeli e rrëzoi Shkallën e Parë duke kthyer sekuestron. Nga ana tjetër SPAK vuri në lojë dhe ligjin antimafia duke vënë për të dytën herë në sekuestro pronat.
Hetimet ndaj ish-kryeprokurorit
Iniciatorja e hetimeve për Llallën ishte pasardhësja e tij Arta Marku. Pasi SHBA e shpalli atë “non grata” dhe në media nisën të qarkullojnë foto të jetës së luksit të fëmijëve të ish-kryeprokurorit, më datë 28.02.2018 nga ana e Prokurorisë së Përgjithshme është dërguar shkresa nr.130 në Prokurorinë e Durrësit. Përmes kësaj shkrese janë depozituar disa shkrime në portale, foto dhe vendimi i SHBA për ta shpallur Llallën “non grata”, si indicie për të nisur hetimet. Pra ishte Arta Marku ajo që hapi rrugën e hetimeve ndaj Llallës, fillimisht nga Prokuroria e Durrësit, e më pas nga Krimet e Rënda. Pas shkrirjes së kësaj të fundit dosja kaloi te SPAK.
Rivlerësimi i pronave
Ajo që bie në sy është se Llalla ka blerë toka shumë lirë fillimisht dhe më pas ka deklaruar se i ka shitur shumë shtrenjtë. Për shembull, në vitin 2007 Llalla ka deklaruar një ullishte në Bathore, blerë 1.5 milionë lekë. Në vitin 2011 ai e rivlerëson pronën në vlerë 21 milionë lekë të reja. Ndërsa po e njëjta pronë në vitin 2016 është shitur 249 mijë euro. Po ashtu ndryshime në vlerë ka pasur dhe për apartamentin në Durrës, tani i sekuestruar. Ai është blerë në mars të vitit 2012 në vlerën 2.2 milionë lekë të reja, ndërsa në prill po 2012, ai e ka rivlerësuar në rreth 5 milionë lekë të reja.
E njëjta gjë ka ndodhur me një tokë në Qeha Shytaj në Tiranë. Ai e ka blerë në dhjetor të vitit 2016 në vlerën 4.5 milionë lekë të reja. Por në maj të 2017 është rivlerësuar në 36 milionë lekë të reja, ose 360 milionë lekë të vjetra. Fillimisht kishte dyshime se kjo ishte një skemë e pastër për pastrimin e parave, por SPAK e ndryshoi akuzën duke e lënë vetëm fshehje pasurie.
