Komisioni i Pavarur i Kualifikimit ka zbardhur të gjitha arsyet pse gjyqtari i Apelit të Krimeve të Rënda, Dhimitër Lara u konfirmua në detyrë. Lara ishte pjesë e trupës gjykuese tek Gjykata e Apelit Tiranë që vendosi të pranojë kërkesën e Izet Haxhisë për rigjykim dhe të rihapë dosjen “Hajdari”. Sipas vendimit, Larës i janë gjetur disa probleme të vogla me pasurinë, por sqarimet e tij e kanë bindur trupën gjykuese. Po ashtu, ai është konsideruar i përshtatshëm nga DSIK për të vijuar detyrën.
DSIK ka dërguar raportin mbi kontrollin e figurës së subjektit të rivlerësimit, z. Dhimitër A. Lara, ku është konstatuar se subjekti është i përshtatshëm për të vijuar ushtrimin e detyrës. Gjatë hetimeve paraprake, nuk ka pasur prova apo të dhëna nga burime të çfarëdo lloji, lidhur me përfshirjen e subjektit në veprimtari korruptive apo në lidhje me persona të përfshirë në krimin e organizuar”, thuhet në vendim. Edhe nga ana profesionale Lara ka dalë i pastër. Për të ka pasur denoncime se është i përfshirë në afera korruptive, por trupa gjykuese nuk i ka provuar dot ato. “Lidhur me denoncimin e shtetasit L. A. Sh. 61, pas verifikimit u konstatua se ky shtetas ka ngritur pretendime për shkelje të ligjit për shkak të paaftësive profesionale dhe korruptim politik të gjyqtarit Dhimitër Lara. Sipas tij, ai ka 20 vjet i akuzuar bashkë me të vëllanë, O. Sh., dhe të tjerë, si themelues dhe anëtar i grupit, duke u akuzuar për krime që nuk i kanë kryer. Në lidhje me pretendimin për korruptim politik të subjektit të rivlerësimit, z. Dhimitër Lara, pasi u shqyrtuan pretendimet dhe dokumentet e vëna në dispozicion, u konstatua se nuk ka asnjë provë dhe dokument që vërteton këtë pretendim”, sqarohet në vendim. Por për konfirmimin e dhënë nga KPK ka patur edhe një përçarje mes trupës gjykuese. Anëtarja Etleda Çiftja ka qenë për shkarkimin e gjyqtarit. “Referuar provave të administruara gjatë hetimit dhe provave të dërguara nga subjekti i rivlerësimit, si dhe nga interpretimi i këtyre provave unë, si anëtar në pakicë/kundër dal në konkluzionin se subjekti i rivlerësimit nuk ka burime të ligjshme financiare për të shlyer kredinë para kohe në vitin 2010, në shumën 2.800.000 lekë, siç ai deklaron”, ka argumentuar ajo.
