Prej rreth 10 vitesh flasim për ndërtimin dhe rehabilitimin e linjës hekurudhore Tiranë-Durrës-aeroport. Por ende sot kjo linjë nuk është vënë në operim.
Kreu i hekurudhave, Ergys Verdho, në një intervistë për emisionin “E-ZONE” në Vizion Plus tregon arsyet pse ky projekt është shoqëruar me vonesa.
“Nismat që janë me financim të huaj, si në rastin konkret, kanë burokracitë e tyre. Fakti që Tiranë-Durrës-Rinas është i vonuar, nga njëra anë na mësoi shumë gjera. Vonesat që kemi hasur në këtë projekt nuk do t’i kemi te projekti më i madh infrastrukturor Vorë-Hani i Hotit.
Linja Tiranë-Durrës-Rinas u nis që në 2015 dhe u konceptua që treni do operonte me naftë. Në 2019 u mor vendimi që projekti të rishikohet, pasi e gjithë linja do të elektrifikohej.
Projekti u bë nga e para. Komponenti tjetër ishte ai i godinave të stacioneve. Ky komponent lidhej ngushtë me kontratën e parë, çka kërkoi një rishikim për të bërë lidhjen me sallat operative të stacioneve. Më pas efektet e pandemisë paralizuan gjithçka dhe frenuan financimet.
Pas pandemisë kriza e çmimeve pati ndikimin e saj në rritjen e çmimeve për të gjitha produktet. Janë këto arsyet pse sot flasim ende për ndërtimin e linjës”, tha Verdho në Vizion Plus.
Nisur nga ecuria e mirë e punimeve gjatë këtij viti, ku kanë përfunduar 80% e tyre dhe puna tashmë është në gjurmën e re Tiranë-Rinas, pritshmëritë janë që në vitin 2026 do të kemi në operim linjë e parë moderne hekurudhore.
“Ne i qëndrojmë këtij afati, pra në 2026 do të kemi trenin e parë elektrik në vend. Në janar ne nisim punën për ndërtimin e stacioneve hekurudhore dhe elektrifikimin e tyre, punime këto që do të mbarojnë brenda vitit”, – sqaroi Verdho.
Ndërkohë këtë javë u hap dhe gara për rehabilitimi e linjës hekurudhorë Vorë-Hani i Hotit, pjesë e financimeve të BE-së.
Ky është projekti më i madh infrastrukturor, 370 mln euro kosto me një gjatësi 120 km. Ne presim që vitin që vjen të nisë puna konkrete për ndërtimin e tij.
Transporti me tren është një nga transportet më me leverdi sa i përket kostove, sigurisë si dhe në mbrojtje të mjedisit.
