Një qytetar me banim në njësinë Dajt, kishte aplikuar që në vitin 2006 për të marrë një leje legalizimi të banesës së ndërtuar mbi pronën e tij, por prej atëhere, vetëm ishte sorrollatur në zyrat e shtetit.
Pas një periudhe të gjatë pritjeje, djali i tij vendosi të shkruajë në platformën e bashkëqeverisjes, e cila e trajtoi dhe i dha zgjidhje kërkesës së tij brenda pesë ditësh.
Në takimin javor të Kryeministrit me qytetarët që marrin zgjidhje nga platforma, qytetari Arjan Beqiri tha se kishte shkruar i irrituar nga kjo sorrollatje në shqipëriaqëduam.al, por mjaftuan vetëm dy minuta për të marrë lejen e legalizimit.
“Shkrova i irrituar në platformë, ndërkohë që unë kisha shkuar mbi 20 herë te zyra dhe më thoshin që për dy javë e ke gati, e ke gati, por nuk ma dhanë kurrë. I bëj thirrje qytetarëve, të shpenzojnë vetëm dy minuta kohë dhe gjejnë zgjidhje”, tha Beqiri.
