Rusia ka emëruar si ambasadorin e saj në Shqipëri drejtuesin e sigurisë së informacionit.
Mihail Yurevich Afanasjev do të zërë vendin e Aleksandër Karpushin. Tre ditë më parë Ilir Meta priti në një takim ambasadorin e ri të Federatës Ruse në Tiranë, pasi Afanasjev i dorëzoi letrat kredenciale.
Por para emërimit në Shqipëri, Mihail Yurevich Afanasjev ishte drejtori i Departamentit të Informacionit në Ministrinë e Punëve të Jashtme ruse.
Edhe pse informacionet mbi aktivitetin dhe fushat që mbulon ky department janë të pakta, mësohet se një prej objektivave kryesor të punës është siguria e informacionit.
Afanasjev ka udhëhequr disa reforma për forcimin e sigurisë të informacionit dhe teknologjisë në Ministrinë e Jashtme ruse.
Njohës i gjuhës angleze dhe franceze, Mihail Yurevich Afanasjev ka qenë këshilltar në Ambasadën e Rusisë në Paris në vitet 1995 – 1999, ndërsa në 1993 – 1994 ka qenë drejtor i Departamentit për Afrikën dhe Lindjen e Mesme në Ministrinë e Jashtme.
Mbërritja e ambasadorit të ri është pasqyruar edhe në faqen e Ambasadës së Rusisë në Tiranë, por pa dhënë shumë detaje mbi karrierën e tij diplomatike.
“Në Tiranë ka mbërritur ambasadori i ri i Federatës Ruse në Republikën e Shqipërisë, z.Mihail Afanasiev. Z.Afanasiev ka lindur në vitin 1954.
Karrierën diplomatike e filloi në vitin 1980. Ai ka punuar në Aparatin qendror të Ministrisë së Punëve të Jashtme të Bashkimit Sovjetik (BRSS) dhe Federatës Ruse, si edhe në përfaqësitë diplomatike jashtë shtetit.
Në vitet 2005-2010 ka shërbyer si ambasador i Rusisë në Etiopi. Para emërimit të tij në Shqipëri ka drejtuar një nga departamentet e MPJ-së. Është i martuar, ka një vajzë”, shkruhet në biografinë e ambasadorit Afanasjev.
