Tifozët e Gjakovës refuzuan të këndojnë himnin e shtetit të Kosovës në dy ndeshjet e fundit të baskektbollit. E gjithë salla njëzëri ka nisur të këndojnë vetëm atë mbarëkombëtar. Një veprim i tillë është shoqëruar me gjobë në Kosovë dhe me debat në studion e emisionit “Ora Sport”, që transmetohet në “Ora TV”.
Edmond Gëzdari nuk e ka përshëndetur gjestin e tifozëve gjakovarë. Sipas tij, rregullat janë vendosur dhe duhen respektuar deri në fund. “Unë e shoh ndryshe. Nuk jam dakort me këtë. Ka rregulla që duhen ndjekur. Po sikur Rama të dalë nesër dhe të thojë: ‘Bëtë gabim që kënduat himnin tonë‘? Ka rregulla“, ka thënë Gëzdari.
Por më pas ka pasuar edhe replika e gazetarit Eno Skarço. Ky i fundit ka mbështetur veprimin e bërë në Gjakovë, pasi në fund të fundit është kënduar himni që i bashkon të gjithë shqiptarët. “E megjithatë, sa bukur kur thyhen rregullat kështu“, ështe shprehur Eno Skarço.
