Heidi Baci ka vendosur të largohet nga shtëpia e Big Brother gjatë natës, pas episodit live, ku ajo u përball me babanë e saj shqiptar, i cili e kritikoi në lidhje me afërsinë që kishte me një prej konkurentëve të tjerë, Massimiliano Varrese.
Babai i kërkoi asaj të kthehej në shtëpi me pretendimin se edhe e ëma nuk ishte mirë me shëndet, ndërkohë që vetë Heidi u shfaq e shkatërruar pas përballjes. Big Brother italian shkroi pas spektaklit se Heidi ishte larguar nga shtëpia për arsye personale.
Genti Baci kishte kërkuar të takonte të bijën pasi afrimiteti i saj me Massimilianon nuk i ka pëlqyer familjes, dhe sipas tij ai i kishte shkelur dinjitetin Heidit.
“Unë nuk të njoh më dhe nuk të shoh më siç ishe më parë. Ti më dukesh si një person tjetër. Nuk ke mundur të krijosh një mur me një person që të kapi dhe të vuri nën stres. Nëna nuk të ka parë më që nga ai moment.
Nuk lejoj njeri te sillet keq me vajzen time dhe ti e di. Nuk lejoj njeri të shkelë dinjitetin tënd. I kam premtuar mamit se do të çoj në shtëpi sonte sepse ti nuk mund ta nënvlerësosh gjendjen e saj shëndetësore”, vijon babai i konkurrentes.
Heidi pajtohet me prindin e saj: “Më fal”, tha ajo mes lotësh. Më pas ajo pati dhe një përballje të shkurtër me djalin me të cilin kishte afrimitet brenda shtëpisë, të cilit iu drejtua: Unë të respektoj, të admiroj, nuk je i dhunshëm. Babait tim nuk i pëlqen të shohë dikë që ka një qëndrim shtypës ndaj meje. Përfundimi është gjithmonë i njëjtë: atraksioni ishte aty, unë u magjepsa nga ty, por le t’i japim fund. Jemi njerëz të ndryshëm, për mua mbaron këtu.
Ndërkohë që konkurenti italian preferoi të fliste pak, për të mos lënduar më shumë bukuroshen shqiptare, e cila duhet thënë që ishte në shok pas hyrjes së babait të saj. “Preferoj të hesht pas akuzave kaq të rënda. Tani e kuptoj se nga çfarë kishte frikë Heidi dhe nuk jam unë.
Ajo me siguri që kia pasur frikë nga gjykimi i babait të saj. Preferoj të hesht sepse është një situatë delikate. Do të doja ta mbyllnim këtu. Ajo që ndodhi sonte është shumë e rëndë. Në një epokë ku ka beteja kundër patriarkalizmit, është vërtet më mirë për mua të hesht. Mora një mësim të madh nga ky udhëtim, më përforcon idenë time si baba, për të inkurajuar vajzën time që të jetojë lirshëm”, tha Varrese.
Ndërkohë që edhe konkurentët e tjerë në shtëpi u shprehën të lënduar nga largimi i Heidit, e madje disa prej tyre thanë se qëndrimi i babait të saj i kishte kthyer 50 vite pas. Shumë komentues shqiptarë e kanë konsideruar situatën e Heidit të ngjashme me atë të Kejsit në Shqipëri, kur Sabiani u bë pjesë e Big Brother, që të ndikonte në ndarjen e saj nga Kristi.
