Sali Berisha, është shprehur se opozita do e fitojë betejën që ka nisur.
Komentet Berisha i bëri gjatë fjalës së tij në mbledhjen e thirrur me drejtuesit politikë të qarqeve, ku tha se gjysmë milioni shqiptarë të lirë (që kanë votuar opozitën) nuk mund të shypen kurrë.
Ai shtoi gjithashtu se PD do të evidentojë të gjitha shkeljet e qeverisë Rama për zgjedhjet e 11 majit dhe do t’i faktojë ato para faktorit ndërkombëtar.
Teksa e krahasoi Edi Ramën me mafiozin Toto Rina, Berisha tha se ai shpalli opozitë të vetme Linda Ramën, duke poshtëruar një komb të tërë.
Pjesë nga fjala e Berishës:
Tani, detyra numër një në këtë fazë, dhe prandaj unë u kam thirrur këtu, u kam shkëputur nga puna, është mbrojtja e votës duke paraqitur dhe faktuar të gjithë universin kriminal të qarqeve tuaja.
Të gjithë ndërhyrjet kriminale në qarqet tuaja, çdo evidentim pasi beteja jonë për mbrojtjen e votës së shqiptarëve është betejë për fatin vendimtar të Shqipërisë dhe demokracisë shqiptare.
Është betejë, të cilën ne do ta fitojmë sepse sot nuk ka shqiptar që e njeh veten të tillë dhe nuk pa me sytë e tij se si me vendime qeverie u grabitën zgjedhjet.
Nuk ka shqiptar që mund të pranojë për standard shpërndarjen e 100 eurove për person për të blerë votën.
Shpërndarjen e miliona bimë kanabis për të blerë votën.
Në këtë mënyrë, Edi Rama ka poshtëruar një komb të tërë. Është dokumentuar një Asad i vërtetë.
Por nuk them Asad, por them Toto Rina, po mu kujtua Lajlaja se sot ai shpalli opozitë të vetme Linda Ramën dhe emëroi disa të tjerë opozitë të emëruar, Tom Doshin e të tjerë.
Diktatorët ngjasojnë njëri me tjetrin.
Pra, nuk ka detyrë mbi çdo detyrë tjetër është dokumentimi me vërtetësi dhe dokumenta të plota.
Ne nisim një betejë të cilën ne do ta fitojmë.
Ne do ta fitojmë sepse së pari këto krime madhore elektorale janë krime të paralajmëruara dhe të denoncuara në rezolutat e fuqishme ndërkombëtare, si asnjëherë më parë.
Së dyti, dua të përshëndes vëzhguesit, të OSBE/ODIHR, Parlamentit Europian dhe të Këshillit të Europës, për konstatimet e tyre madhore, me të cilat këto zgjedhje de facto rrëzohen.
Por tani është radha jonë të dorëzojmë të faktuar të gjithë batërdinë elektorale të narkoregjimit në zgjedhjet e 11 Majit.
Me datën 16 fillon protesta për një sensibilizim të udhëheqësve europiane se ndodhen në një narkoshtet që nuk respekton asnjë rregull, asnjë parim të votës së lirë.
Dhe kjo jo se e themi ne, por që e thonë katër rezoluta ndërkombëtare të partive që qeverisin botën.
Deklaratat paraprake nuk mund të dekurajojnë ne në betejën tonë që shqiptarët të votojnë si qytetarë të lirë, me zotimin solemn se me Edi Ramën nuk ka votë të lirë.
Por këto kohëra që vijnë, janë kohëra përcaktuese në rrafshin kombëtar dhe ndërkombëtar për mbrojtjen e votës së shqiptarëve, për luftën për mbrojtjen e votës së shqiptarëve.
Kjo është një kauzë e drejtë, e dobishme, e vlefshme për çdo sakrificë.
Kjo është një kauzë e drejtë, e cila do triumfojë.
Mandat mbi krimin, legjitimitet mbi krimin nuk ka dhe nuk do ketë.
I them Edi Ramës se gjysmë milioni shqiptarë të lirë nuk mund të shtypen kurrë.
Gjysmë milioni njerëz të lirë janë më të guximshëm se shumë milionë të tjerë skllevër, njerëz të blerë apo të shitur.
Ndaj dhe ne duhet t’u dalim zot me vendosmëri të madh aspiratave të votës së lirë të gjysmë milioni shqiptarë.
