Sali Berisha gjatë “Foltores” së djeshme në Sarandë ka vijuar me këmbënguljet për fshehjen e firmave. Berisha deklaroi se çdokush që ka dëshirë të shohë firmat mund të vejë t’i shohë teksa u shpreh se nuk do të bëhen publike.
Ish-kryeministri u justifikua se me këtë zgjedhje po respektohet ligji për garantimin e të dhënave personale. “O peng kryetar ti do shohësh çdo fletë shko merri dhe kontrolloji të 4200, ke zero tagër për to.
Ato janë depozituar në zyrën e kryetarit të Këshillit Kombëtar. Mund të shkoni aty t’i lexoni. Ne ato nuk i publikojmë sepse ka një ligj, ne miratuam ligjin e garantimit të dhënave personale. Kush të dojë do ti shohë, por ata kanë tmerr prej tyre”, deklaroi Berisha.
Nga ana tjetër ish-kreu i PD ka vijuar me lavdërimin për “Foltoren” si gjëja më pro-perëndimore në gjithë këtë krizë dhe sipas tij nofkat e vendosura për këtë lëvizje janë thjesht nga tmerri që i ka zënë mbështetësit e Bashës. Berisha e quajti Bashën një lider të thyer e të paaftë për të udhëhequr PD teksa e akuzoi për bashkëpunim me të majtët.
“Partia Demokratike është parti, e cila u themelua nga studentë, intelektualë. Ne jemi përgjegjës për ata që nuk janë sot mbi tokë. Zotohemi dhe betohemi se do të garantojmë liritë dhe do të bëjmë gjithçka për të ardhmen e fëmijëve tanë. Foltores i kanë vendosur nofka nga frika dhe tmerri i saj, nuk ka asgjë më pro-perëndimore si kjo foltore.
Ne si PD kaluam një krizë dhe po kalojmë një krizë të thellë. Kryetarin që e mbështetën të gjithë, me mundësitë më të mëdha. Mahnitem nga mundi i demokratëve. Por problemi është ai që drejtojnë partinë ishte një lider i thyer, nuk e udhëhiqte dot këtë forcë politike, nuk e ndjente cila është fuqia e saj. E s’postoi majtas.
I dha partisë një formë sikur të ishte e qendrës së majtë dhe kjo zhgënjeu shqiptarët. Ky njeri i shkolluar në perëndim sillet sikur të kishte ardhur nga Koreja e Veriut. Tani përpiqet të delegjitimojë nismën tuaj”, tha ai.
