Vendimi i Departamentit të Shtetit për ta shpallur të padëshiruar ka rritur rrezikun ndaj ish-kryeministrit Sali Berisha nga drejtësia e re. Deri më tani, Berisha ka qenë i paprekshëm pasi çdo çështje kundër tij është mbyllur. Rasti më i fundit është i marrëveshjes me CEZ, ku gjykata pushoi hetimet.
Por situata ka ndryshuar pas vendimit të DASH dhe presioni ndaj drejtësisë është rritur ndjeshëm. SHBA kërkon të marrë fund pandëshkueshmëria dhe kreu i SPAK, Arben Kraja pak ditë më parë u shpreh qartë se në momentin që Ambasada e SHBA do të vërë në dispozicion të tyre të dhënat dhe indiciet për përfshirje të Berishës në korrupsion, ata do të nisin hetimet.
Por sa i rrezikuar është Berisha nga SPAK dhe drejtësia? Nëse shohim të gjithë zyrtarët e lartë në vend, Berisha është personi që ka më shumë kallëzime. Edhe pse ai është shprehur nëpër media se kurrë s’ka pasur akuza ndaj tij për korrupsion, në SPAK momentalisht kemi 3 dosje që nëse hetohen si duhen, lëkundin pozitat e ish-kryeministrit. Dosja për të cilën kanë nisur hetimet është ajo e marrëveshjes CEZ-DIA.
Juristi Romeo Kara ka bërë një padi ndaj ish-kryeministrit Berisha dhe presidentit Meta, duke i akuzuar se i shkaktuan shtetit rreth 39 milionë euro dëme nga pakti CEZ-DIA. Berisha ishte kryeministër në atë kohë dhe Meta zëvendësi i tij. Pak javë më parë gazeta bëri me dije se hetimet kanë nisur dhe po pyeten shumë persona lidhur me këtë dosje.
Dosja e Klubit Partizani
Një tjetër dosje e bujshme është ajo e privatizimit të Kompleksit Partizani. Në fund të vitit që lamë pas kreu i Grupit Parlamentar të PS, Taulant Balla paditi ish-kryeministrin Berisha, dhëndrin e tij dhe ish-ministrin e Mbrojtjes, Arben Imami. Sipas padisë, privatizimi i tokës në fjalë është bërë në shkelje të ligjit, ndërkohë që ai që ka përfituar në këtë mes është dhëndri i tij. Malltezi është pronar i disa pallateve aty.
Toka në fjalë ka qenë e pronarëve, por ajo i ka kaluar shtetit dhe në vitin 1940 ata janë dëmshpërblyer nga qeveria italiane, pasi vendi ynë ishte pushtuar nga Italia. Madje pronarët janë shpërblyer me franga ari. Qeveria italiane kishte plane të bënte një aeroport aty dhe prandaj mori tokën. Madje toka është blerë nga Shefqet Vërlaci dhe Jako Mane.
Toka, nga “Rr. e Kavajës” deri tek “Rr. Durrësit” është blerë nga italianët dhe më pas ka kaluar në duart e shtetit. Pra, pretendentët e këtyre pronave janë kompensuar një herë nga italianët dhe më pas toka është shtetëzuar, duke i kaluar në pronësi Ushtrisë. Sipas padisë, kemi shkelje flagrante.
Paditë e Haxhisë
Dosja e tretë ka të bëjë me një padi të bërë nga Izet Haxhia, i cili e akuzon Berishën për 23 vepra penale. Haxhia ka qenë truproja e Berishës kur ky i fundit ishte president dhe në Prokurorinë e ish-Krimeve të Rënda ka dëshmuar disa ditë rresht. Sipas burimeve, bëhet fjalë për 140 faqe dëshmi kundër Berishës.
Dosja ka kaluar tashmë te SPAK dhe prokurorët kanë marrë padinë bashkë me dëshminë. Haxhia e akuzon Berishën që nga firmat piramidale, vrasja e Hajdarit, vrasjen e Remzi Hoxhës, vjedhjen e floririt në Krrabë, etj. Bëhet fjalë për një padi shumë të fortë nga Haxhia dhe ai ka dëshmuar se në disa prej ngjarjeve ka marrë vetë urdhër nga Berisha.
Dosja e “21 Janarit”
Ndërkohë në Prokurorinë e Tiranës kemi dosjen e “21 Janarit”. Prokuroria ka rihapur hetimet dhe padyshim ish-kryeministri është i rrezikuar në këtë mes. Shumë persona e akuzojnë se ai pengoi hetimet duke izoluar në Kryeministri gardistët. /Kliti Topalli
