Sali Berisha thotë se nuk tërhiqet për t’u vetëzgjedhur në krye të Partisë Demokratike pavarësisht kërkesave për t’u tërhqeur.
“Unë mund të them që me blofin nuk mund të luhet dhe me blofin luan sot një dyshe që kalon nga një studio në studion tjetër, dyshja Baton-Zogaj. Mos dëgjoni fjalët e tij”, tha ai.
Në një deklaratë për mediat në oborrin e Parlamentit, Berisha tha se grupi parlamentar është institucion i plotë operativ në PD ku mund të zhvillohet debati për bashkimin. Sipas ish-kryeministrit bashizmi ishte dhunim i statutit dhe iku bashkë me Lulzim Bashën.
“Dua të garantoj demokratët në të gjitha nivelet jemi të hapur të bëjmë gjithçka për garantimin e votës së lirë dhe bashkimin rreth votës së lirë.
Ajo kryesi është shkarkuar kjo nuk do të thotë se fjala e demokratëve cilido qoftë ai nuk dëgjohet. Fola për 11 Dhjetorin, por sanksionimin më të plotë e mori në datën 6 mars. Në këtë kontekst ajo çka unë dua të theksoj dhe dua tu siguroj se PD ka institucionin e saj tashmë operativ dhe të plotë dhe ky është grupi parlamentar.
PD ka instutucion e saj Komisionin e Rithemelimit. Unë gjykoj që debati brenda grupit parlamentar mund të diskutohet për çdo gjë. Sikundër duhet të theksoj dhe ftoj miqtë e mi të mos harrojnë bashizmi ishte doktrinë e dhunimit të statutit. Ai u arkivua sëbashku me dorëheqjen e Lulzim Bashës.
Askush nuk mund të mendojë të paraqesë sikur ekzistojnë dy parti. Është vetëm një PD. Unë po takoj edhe një proces i mrekullueshëm po ndodh në bazë. Po takoj kryetare që deri dje kanë qenë në takimin me Bashën, por janë haptas të qartë se 6 marsi ka vetëm një mesazh bashkimin dhe ia kanë thënë të qartë Bashës. Nuk dua të bëjmë asnjë lloj spekulimi, në grupin parlamentar janë të gjithë të përfshirë”, deklaroi Berisha.
