Pas zgjedhjeve të 30 qershorit pritet tërmet në politikë. Opozita po bën gjithçka për të destabilizuar vendin, por ndërhyja e ndërkombëtarëve ka bërë që Basha të tërhiqet dhe skenarët Berisha-Kryemadhi të dështojnë. Por e gjithë kjo luftë duket se ka në prapaskenë reformën në drejtësi. Pas 30 qershorit aksionet e opozitës pritet të nisin të zbehen, ndërsa vëmendja do të jetë e gjitha te Këshilli i Lartë Gjyqësor dhe Këshilli i Lartë i Prokurorisë, të cilët do të vendosin për ngritjen e SPAK dhe Byrosë Kombëtare të Hetimit. Pra, brenda shtatorit pritet që të nisë vala e arrestimeve në vend, për të dërguar pas hekurave këdo që ka futur duart në xhepat e qytetarëve. Sinjali i parë ka ardhur nga gazetari Baton Haxhiu, i cili njihet dhe si këshilltar i kryeministrit Edi Rama. Ai ka thënë se pas zgjedhjeve do nisin arrestimet dhe nuk do ketë tolerim për askënd.
“Unë jam i bindur që zgjedhjet do të mbahen më 30 qershor. Kjo është definitive. E dyta, pas 1 korrikut do kënaqeni në Shqipëri duke parë rendin e njerëzve duke shkuar në burg. Jam i sigurt, këtë e kanë përjetuar të gjitha vendet. Edhe e treta, Shqipëria më datën 1 korrik e fillon një jetë të re politike, besomëni që unë e kam këtë ndjenjë. Unë jam i bindur që një parti politike e re do të lindë. Ajo që do të ndodhë, do të ketë një Parti Demokratike të re. Partia Demokratike e re realisht do të jetë pjesë e një politike e cila do të ndryshojë edhe Shqipërinë”, argumentoi Haxhiu. Me tej ai deklaroi se kushdo që ka bërë gabime në politikën shqiptare, do duhet të mbajë përgjegjësi. “Politikanët kanë bërë mëkate të shumta dhe mëkatet duhet të dënohen. Fakti që Shqipëria ka qenë një vend që e ka amnistuar krimin dhe shoqëria shqiptare me shumë hezitim ka bërë presion për të dënuar kriminelët. Beteja nuk është politike, por është betejë për drejtësi. Beteja nuk është për të shpëtuar jetën e një partie politike. Beteja mbas 1 korrikut është beteja e individit udhëheqës për ti shpëtuar burgut. Në Shqipëri janë të rrallë ata politikanë që nuk e meritojnë burgun. Shoqëria shqiptare do e shohë se pas 1 korrikut kjo do ndodhë”, tha ai. Por sinjalet se do kemi tërmet me gjasë deri në vjeshtë, kanë filluar të jepen.
Lëvizjet për arrestime
Sinjali i parë se ora e të paprekshmëve po afron ka ardhur nga Komisioni i Pavarur i Kualifikimit. 10 prokurorë që kandidojnë për SPAK u konfirmuan në detyrë. Kushtetuta e ka përcaktuar që Prokuroria Speciale kërkon minimalisht 10 emra. Fakti që janë konfirmuar në detyrë 10 prokurorë, tregon se SPAK është afër. Gazeta tregoi pak ditë më parë se në Tiranë kanë mbërritur 12 agjentë të FBI. Ata po bëjnë gati terrenin që menjëherë pas SPAK të ngrihet Byroja e Hetimit. Po ashtu presioni ndërkombëtar është rritur ndjeshëm. Vendet e BE shtynë për në tetor vendimin për negociata dhe ky është shansi i fundit. Gjermania dhe shtetet skeptike kërkojnë arrestime. Pra, nëse deri në tetor nuk shkojnë pas hekurave emra të njohur, negociata duhet të harrohen. Por çelja e negociatave sjell gjithashtu hapjen e kapitujve 23 dhe 24 që kanë të bëjnë me drejtësinë. Kjo do të thotë se BE kërkon prova konkrete të luftës ndaj korrupsionit, pra arrestime. Sinjali është dhënë ditët e fundit dhe nga ambasadori i BE, Luigi Soreca. Ai ka pasur një sërë takimesh, më i fundit me kreun e KLP, Gent Ibrahimin, ku kërkoi që të ngrihet me urgjencë SPAK. Burime të gazetës thanë se brenda korrikut, mbyllet procesi për SPAK. KLP dhe KLGJ po ecin të koordinuar dhe brenda një dite pritet të përzgjedhin gjyqtarët dhe prokurorët që do marrin në dorë luftën antikorrupsion. Kjo tregon qartë se përse po bëhet gjithë kjo luftë. Me ngritjen e SPAK dhe BKH askush nuk është imun ndaj hetimeve, pasi ato mund të hetojnë që nga presidenti e kryeministri, deri te deputetët, ish-deputetët, ministrat, ish-ministrat dhe gjyqtarët e prokurorët. Po ashtu pritet të hapen dhe shumë dosje që flenë në sirtare prej vitesh. Menjëherë në SPAK do kalojnë dosjet që janë në hetim dhe i pari që rrezikohet është kreu i PD, pasi prokuroria ka kopsitur çështjen e lobimeve në SHBA dhe po bëhet gati për gjykim. Por nëse ngrihet SPAK, ajo kalon aty dhe Basha fundoset. Pra është e qartë se pas 30 qershorit do ketë zhvillime dhe të gjithë janë trembur. /Kliti Topalli
