Pas kërkesës së bërë nga ana e ONM ndaj Komisionerit Publik për të apeluar vendimin e KPK tek Kolegji i Apelimit, kreu i Gjykatës së Lartë Xhezair Zaganjori rrezikon shkarkimin. Por teksa kreu i Gjykatës së Lartë rrezikon shkarkimin, Gjykata supreme është e përmbytur nga dosjet por e boshatisur nga gjyqtarët.
Nga 19 që duhet të ishin në detyrë, shkalla e fundit e gjyqësorit ka mbetur për momentin vetëm me kryetarin Xhezair Zaganjori dhe gjyqtarët Medi Bici, Ardian Dvoranin dhe Edmond Islamaj dhe vështirë se do të ketë zgjidhje të shpejtë për 26.500 qytetarët që presin drejtësi. Por edhe pse në të vërtetë në gjykatë janë katër gjyqtarë, Gjykata e Lartë rrezikon të ngelet me 2 gjyqtarë pas ankimimeve të bëra nga ana e Operacionit Ndërkombëtarë të Monitorimit dhe Komisionerit Publik për gjyqtarin Xhezair Zaganjori dhe Edmond Islamaj.
Por edhe pse të dy gjyqtarët rrezikojnë të shkarkohen, ajo çka është më shqetësuese për gjykatën supreme është fakti se në këtë moment ajo nuk po funksionon as me kalendar gatishmërie për shkak të vetingut. Sipas informacioneve të gazetës ”SOT”, deri më tani gjykata duke marrë parasysh faktin se ka një numër të madh dosjesh që po presin, po i shqyrton ato vetëm me çështje emergjente. Kështu, vetëm ditën e djeshme, gjyqtarët e ngelur, edhe pse dy rrezikojnë të shkarkohen, kanë shqyrtuar 96 çështje të konsideruara urgjente.
Por edhe pse deri më tani trupa gjyqësore e ngelur po shqyrton dosjet që kanë afate, pasi nëse këtyre çështjeve u kalon afati, disa dosje mund të hyjnë në kolaps, situata do të vështirësohet akoma më shumë për këtë organ e cila do të ketë të njëjtin fat si Kushtetuesja. Kjo për faktin se sipas procesit të vetingut, dy organet me numrin më të lartë të gjyqtarëve të korruptuar gjatë fazës së parë të procesit të vetingut ishte Gjykata e Lartë dhe ajo Kushtetuese. Për momentin Kushtetuesja është jashtë funksionimit, ndërkohë që Gjykata e Lartë është kthyer në një urgjencë që zgjidh vetëm çështjet me afate.
