Shtetet e Bashkuara të Amerikës kanë vendosur të marrin masa, sa i takon situatës së paqëndrueshme në Ballkan. Prej gati një viti Shqipëria, Serbia, Mali i zi dhe Bullgaria janë përfshirë nga protesta të shumta duke rritur shanset për destabilizim dhe krijuar mundësi për ndërhyrjen e Rusisë. Por situata tani e tutje duket se do të ndryshojë pasi Sekretari Amerikan i Shtetit, Mike Pompeo ka vendosur që Zëvendës Ndihmës Sekretari Matthew Palmer të emërohet si i dërguar special për Ballkanin Perëndimor.
Por futja në lojë e Palmerit është një sinjal shumë i fortë për ata që po tentojnë destabilizimin e Shqipërisë. Presidenti Ilir Meta prej javësh po ushtron presion ndaj Bashës që të shkohet tek protesta e dhunshme në shtator me qëllim rrëzimin e qeverisë. Dy ditë më parë Meta deklaroi hapur se nuk duhet të lejohet instalimi i një shteti totalitar, pra duke nënkuptuar se kjo qeveri duhet të marrë fund. Por futja në lojë e Palmer pritet që të prishë të gjitha planet e presidentit dhe opozitës, pasi ai tani do të jetë më i fokusuar tek kriza politike. Qëndrimet e fundit të Palmer ndaj veprimeve të opozitës dhe presidentit kanë qenë mjaft kritike, çka do të thotë se Meta, Basha, Berisha dhe Kryemadhi nuk do e kenë shumë të lehtë tani të shkojnë tek përplasja civile. Palmer pritet që t’i shpeshtojë vizitat në vendet e Ballkanit duke mos lejuar që pro-rusët të nxisin përplasje. “Në këtë rol, zoti Palmer do të udhëheqë përpjekjet tona për të forcuar angazhimin diplomatik amerikan në mbështetje të paqes, stabilitetit dhe begatisë në rajon dhe për t’u përqendruar në integrimin e vendeve të Ballkanit Perëndimor në institucionet perëndimore. Palmer do të shkojë në Slloveni duke filluar nga 1 shtatori për të marrë pjesë në Forumin Strategjik të Bledit, ka njoftuar Departamenti Amerikan i Shtetit. Gjithashtu Palmer do të vazhdojë të jetë Zëvendës Ndihmës Sekretar në Zyrën e Çështjeve Evropiane dhe Euroaziatike, përveç shërbimit si Përfaqësues i Posaçëm i Sekretarit një post që ai mban që nga viti 2018.
Armiku i Metës dhe Berishës Matthew Palmer… mund të quhet si “armik” i dyshes Meta-Berisha, pasi ai frenoi hovin e tyre destabilizues në qershor. Ai ka dalë disa herë kundër opozitës dhe presidentit Meta duke bërë thirrje për qetësi në zgjedhjet e 30 qershorit si edhe ka dalë pro këtyre zgjedhjeve pasi ai i shihte si zgjedhje që duheshin zhvilluar si zakonisht. Ai paralajmëroi para 30 qershorit se nëse do të kishte dhunë, krerët e partive do shpalleshin “non grata”. “U bëjmë thirrje udhëheqësve të opozitës t’ua bëjnë të qartë përkrahësve të tyre që më 30 qershor të mos ketë dhunë, që askush të mos pengojë të drejtën e atyre që dëshirojnë të marrin pjesë në zgjedhje. Protestat paqësore janë pjesë e qeverisjes demokratike. Kjo është shumë normale. Ne e pamë më 21 qershor se opozita është plotësisht e aftë të paraqesë argumentet e veta në mënyrë paqësore, në një mënyrë që përputhet me praktikat demokratike. Ne duam të shohim që edhe në 30 qershor ngjarjet të zhvillohen pa dhunë. Ne u bëjmë thirrje udhëheqësve të opozitës t’ua bëjnë këtë të qartë përkrahësve të tyre”, ka thënë Palmer në lidhje me mundësinë për dhunë. Por ai i dha shuplakë të fortë edhe presidentit Meta. Palmer njohu rezultatin e zgjedhjeve më 30 qershor, duke thënë se ata që nuk e njohin (pra presidenti) të ankohen te Kushtetuesja kur të ngrihet. “Unë mund t’ju them se vëzhguesit tanë panë dhe ndoqën nga shumë afër atë që dëgjuam nga Misioni Monitorues i OSBE-ODIHR-it, pra që zgjedhjet dhe procesi aktual i votimit u zhvilluan kryesisht në mënyrë të përgjegjshme dhe transparente, por procesi i përgjithshëm i mohoi popullit të Shqipërisë një alternativë kuptimplote. Pra, ekzistojnë shqetësime dhe rezerva reale në lidhje me vetë zgjedhjet, siç artikulohen nga OSBE-ja. Përsa i përket se cilat janë përgjigjet e duhura ndaj kësaj, ne do dëshironim ta shihnim këtë të dilte nga institucionet shqiptare”, tha ai. Ndërsa Meta e sulmoi më pas ashpër. Fakti që tani Palmer është Guvernator për Ballkanin, duket se do izolojë ndjeshëm presidentin dhe Berishën./Arbjona ÇIBUKU
