Zv/ambasadorja e SHBA u ka dërguar një mesazh dje dhe Bashës, Berishës e Kryemadhit. Duke folur në takimin për NATO, ajo ju drejtua të gjithë atyre që janë skeptikë për reformën në drejtësi dhe që lëshojnë akuza se ajo është e kapur politikisht. Leyla Moses-Ones ja u bëri të qartë se po gabojnë me sulmet.
Sipas saj, reforma është në rrugën e duhur dhe shumë shpejt korrupsioni do të çrrënjoset. “Përparimi duhet të vazhdojë për të përmirësuar zbatimin e ligjit, çrrënjosjen e korrupsionit dhe krimit të organizuar, dhe krijimit të një ekonomie të forte që është e lirë dhe e barabartë për cilindo.
Lajmi i mirë është se Shqipëria është në drejtimin e duhur, pavarësisht se ka ende punë për të bërë. Reforma në drejtësi, për shembull, është ende në shinat e duhura dhe shumë shpejt do t’iu sjellë shqiptarëve sistemin e ndershëm dhe transparent të drejtësisë që meritojnë. Mesazhi im për cilindo që thotë se reforma në drejtësi është kompromentuar apo po dështon është: e keni gabim”, tha ajo.
Mesazhi i diplomates shkon sigurisht për Kryemadhin, Bashën, Berishën, por dhe Metën. Berisha e Kryemadhi kanë deklaruar disa herë se reforma ka vdekur. Ndërsa Basha me Metën akuzojnë Ramën se ka kapur reformën. Por zyrtarja e SHBA i paralajmëroi dje se kjo reformë po ecën dhe shumë shpejt do shihen frytet e saj. /Kliti Topalli
