Shtetet e Bashkuar të Amerikës kanë vendosur të marrin masa për të ndalur çdo skenar destabilizues në Shqipëri dhe rajon.
Teksa në Bosnjë dhe Hercegovinë po i fryhet zjarrit të luftës, në Tiranë ish-kryeministri Sali Berisha po paralajmëron kaos dhe tensione. Por dy ditë para protestës së 8 janarit të thirrur nga Berisha, ka ardhur një paralajmërim shumë i fortë nga përtej oqeanit Atlantik.
SHBA-të kanë njoftuar se do të ngrenë në Shqipëri një bazë, tek e cila do të dislokojnë trupa speciale, të cilët do të jenë në gatishmëri për t’iu përgjigjur çdo skenari destabilizues. Kjo është bërë e ditur dje në faqen zyrtare të Komandës së Operacioneve Speciale Amerikane në Europë (US SOCEUR), e cila mes të tjerash e konsideron vendin tonë një aleat të fuqishëm të NATO-s.
“Shtutgart, Gjermani – Si pjesë e përpjekjejeve të vazhdueshme për rritjen e aftësive të Forcave të Operacioneve Speciale, si një gur themeli për stabilitetin rajonal, Komanda e Operacioneve Speciale të SHBA-së për Evropën (SOCEUR) ka vendosur të ngrejë në Shqipëri një shtab të bazës të Forcave të Operacioneve Speciale, me rotacion. SOCEUR luan një rol të rëndësishëm për të demonstruar përkushtimin e SHBA-së ndaj aleatëve dhe partnerëve tanë në Ballkan dhe kjo përpjekje po kryhet me mbështetjen e plotë të qeverisë shqiptare.
Nëpërmjet trajnimeve të vazhdueshme dhe bashkëpunimit të ngushtë, Forcat e Operacioneve Speciale të SHBA-së sigurojnë një lidhje të rëndësishme midis aleatëve dhe partnerëve tanë në rajon, duke rritur kështu stabilitetin rajonal. SOCEUR ka një pozicion unik për të stimuluar marrëdhënien tonë me aleatët dhe partnerët për t’iu kundërvënë ndikimeve keqdashëse, për të ndërtuar ndërveprueshmërinë, për t’iu përgjigjur me shpejtësi kërcënimeve që mund të lindin dhe nëse është e nevojshme, për të mposhtur sulme”, thuhet në njoftimin e komandës amerikane me qendër në Gjermani.
Pra lajmi që amerikanë kanë vendosur të sjellin forca speciale në Shqipëri është një mesazh i qartë edhe për ish-kryeministrin Berisha, duke i treguar se SHBA-të nuk do lejojnë që të cenohet stabilitet në vend.
Reagon ambasadorja Kim
Por përveç lajmit për instalimin e forcave speciale amerikanë në Shqipëri, një shuplakë “Berishës ia ka dhënë dje edhe ambasadorja e Shteteve të Bashkuara të Amerikës në Tiranë, Yuri Kim. Kjo e fundit reagoi dje në rrjetet sociale sa i takon ngritjes së shtabit pararojë në Shqipëri, ndërsa thekson se ky është një zhvillim me rëndësi për marrëdhëniet mes dy vendeve.
Sipas saj, ardhja e forcave speciale amerikane në Shqipëri është një tregues i qartë se nuk do të lejohet që të destabilizohet vendi jonë nga njerëz apo palë të treta. “Një mënyrë e jashtëzakonshme për të nisur vitin e ri me një zhvillim të rëndësishëm në marrëdhënien SHBA-Shqipëri në fushën e mbrojtjes. Hera e parë që Shtetet e Bashkuara të Amerikës ngrenë një seli të këtij lloji në Shqipëri.
E rëndësishme për sigurinë rajonale, shkruan ambasadorja e SHBA në Tiranë, Yuri Kim. Pra, duket qartë se Shtetet e Bashkuara të Amerikës paralelisht me shpalljen “non grata” të individëve të korruptuar dhe që kanë minuar demokracinë ë në vende të ndryshme të rajonit të Ballkanit, po marrin edhe masa që të mos lejojnë që këto vende të shkojnë në destabilitet. Ngrija e qendrës pararojë në Shqipëri është e dyta pas asaj që SHBA-të kanë në Gjermani./Rigels Seliman
