Shtetet e Bashkuara të Amerikës vijojnë t’iu dërgojnë mesazhe shteteve kundërshtare. Sa i takon ndikimit në Ballkan, Rusia shihet si shteti që po tenton të influencojë në rajon, por SHBA muajt e fundit ka dërguar mesazhe shumë të forta.
Fillimisht u mbyll stërvitja e “Defender 21”, ndërkohë trupat ushtarake amerikane qëndruan në vendin tonë.
Ndërsa ditët e fundit ka pasur reagim dhe nga Departamenti Amerikan i Shtetit, i cili ka bërë të qartë se Kosova, Shqipëria, Maqedonia dhe Bosnja janë në krah të SHBA. Në një raport ku flitet mbi ecurinë e ushtrive të vendeve të rajonit, për Shqipërinë DASH shkruan se, puna me Forcat e Armatosura po avancon në ritme të shpejta, sidomos në bashkëpunimin me NATO-n.
Sipas DASH, këshilltari i Mbrojtjes Globale nëpërmjet politikave efektive ka bërë të mundur që të shtohet mbështetja e SHBA-ve për FA në Shqipëri dhe madje janë bërë bashkëpunëtorë shumë të mirë. “Në Shqipëri, Këshilltari i GDRP, Tony Medina, ka avancuar një kuadër të nivelit strategjik për menaxhimin e burimeve njerëzore dhe trajektoren e karrierës së personelit të Forcave të Armatosura Shqiptare Kjo avancon kërkesat e Shqipërisë për ndërveprimin ndaj NATO-s në lidhje me strukturën e saj të forcës ushtarake.
Puna e Medinës ndihmon për të riafirmuar mbështetjen e Shteteve të Bashkuara për aleatët e NATO-s. Si rezultat, Shefi i Shtabit të Përgjithshëm dhe AAF kanë miratuar një politikë të re për përparim dhe nëntë politika të tjera janë aktualisht nën shqyrtim nga një komision i posaçëm”, thekson DASH. Në këtë raport vlerësohen hapat e marra nga qeveria shqiptare për të dhënë kontributin e saj në NATO, duke vënë në dukje se këto veprime tregojnë një aleancë të fortë dhe të suksesshme Shqipëri-SHBA.
“Mbështetja e Kryeministrit për praktikat e mira në qeverisjen e sektorit të sigurisë avancon sigurinë kombëtare të Shteteve të Bashkuara dhe interesat e përbashkëta dhe promovon aleancat dhe partneritetet e nevojshme për të pasur sukses në mjedisin gjeopolitik të sotëm konkurrues”, është shprehur DASH. Me qëndrimin e fundit DASH duket se ka dërguar një mesazh të qartë për vendet që nuk na duan të mirën.
Mesazhet nga ambasada amerikane
Po kaq të forta kanë qenë edhe mesazhet e ambasadores amerikane, Yuri Kim, ndaj Rusisë dhe cilitdo shteti tjetër që kërkon të cenojë Ballkanin. Në deklarata të vazhdueshme ajo ka bërë të ditur se trupat amerikane nuk do tërhiqen nga Shqipëria dhe stërvitja e përbashkët do të vijojë.
Ndërkohë, ditën e djeshme përmes një postimi zyrtar ambasada amerikane ka treguar se gjeneralja e Gardës Kombëtare të New Jersey është takuar me pilotët e FA në Shqipëri. Përmes këtij lajmi, Ambasada ka treguar se tashmë po fillon një cikël i gjatë i trajnimesh mes dy vendeve. “Gjeneralja e Brigadës Lisa J. Hou, Ndihmës Gjenerale e New Jersey, takohet me pilotët nga Forcat e Armatosura të Shqipërisë, ndërsa mban në dorë një portret të gdhendur me shqiponjën shqiptare dhe heroin kombëtar, Skënderbeun.
Pilotët shqiptarë morën pjesë në fluturime për t’u familjarizuar me helikopterët UH-72 Lakota të Gardës Kombëtare të New Jersey, si pjesë e një bashkëpunimi të gjatë midis Forcave të Armatosura Shqiptare dhe Gardës Kombëtare të New Jersey”, thuhet në njoftim. /SHKRUAR NGA ESMERALDA HIDA
