Një ditë pasi arrestimit nga policia e Kosovës, avokati nga Prishtina, Tomë Gashi, njoftoi si përfaqësues ligjor i klientit të tij, se Albert Veliu i njohur si “Babalja”, është liruar dhe se nuk do të lëvizë nga qendra e azilantëve, përsa kohë nuk ka një kërkesë zyrtare për ekstradim në Shqipëri. Arrestimi i Veliut, erdhi pasi Gjykata e Krimeve të Rënda në Shqipëri, pranoi kërkesën e Prokurorisë për urdhër arresti ndaj tij, nën akuzën e “kallzimit të rremë”, për rastin e audiopërgjimit.
Sipas burimeve të ekskluzive.al, avokati Tomë Gashi është përfaqësuesi ligjor i personazheve më të njohur të politikës kosovare si Hashim Thaçi, Kadri Veseli, dhe Azem Syla, e për rrjedhojë nuk është aspak i “lirë”! Madje nga informacionet, një shërbim i tij… paguhet sa “frëngu pulën”.
Logjikisht pyetja e parë që na vjen ndërmend është, si arriti të pagoi “Babalja” avokatin më të shtrenjtë të Kosovës, të jetë mbrojtësi i tij, kur vetë ai ka pranuar se jetonte me rrogën e djalit kamarier?!
Në këtë pikë, pyetja e duhur do të ishte: Kush janë personat e implikuar në dosjen “Babale”, që kanë interes dhe mundësi të paguajnë avokatin më të shtrenjtë të Kosovës, që Albert Veliu mos të ekstradohet në Shqipëri dhe të jap llogari përpara drejtësisë?!
Kush është avokati Tomë Gashi, që për nga CV-ja e ka më të pasur se të Babales:
Për ata që nuk e njohin avokatin e VIP-ave Tom Gashi, ai ka qenë disa herë në qendër të vëmendjes së medieve kosovare, si:
1) Avokati është dënuar me 6 muaj burg për pengimin e personave zyrtar në ushtrimin e detyrës:
Tomë Gashi, avokat nga Prishtina është gjetur fajtor për pengim të personit zyrtar gjatë ushtrimit të detyrës zyrtare. Gashi është dënuar me gjashtë (6) muaj burg për një incident të ndodhur në vitin 2008 në një restorant në Prishtinë. Ai ishte përfshirë në një incident me disa policë, derisa këta të fundit ishin duke kryer punën e tyre. Gashi është dënuar me kusht, dënim ky i cili nuk do të zbatohet nëse gjatë një viti i dënuari nuk kryen ndonjë vepër tjetër penale.
2) I akuzuar nga bashkëshortja për dhunë:
Bashkëshortja e avokatit, shtetasja B. Gashi, pretendon se bashkëshorti i saj, Tomë Gashi, e ka sulmuar atë fizikisht të enjtën e 28 shtatorit 2017, teksa ka raportuar në polici se bashkëshorti i saj avokat e ka goditur atë me boks në kokë. 51-vjeçarja ka thënë për policinë, se Tomë Gashi e ka goditur atë me boks në kokë dhe ndër brinj.
3) I hetuar nga organizma ndërkombëtarë si UNMK dhe Eulex për afera kriminale, korrupsion dhe ryshfet:
Gazetari Milaim Zeka shkruante më vitin 2016 se: “Ju them me përgjegjësi morale, njerëzore, qytetare dhe profesionale si gazetar, që kam për detyrë informimin korrekt, se në Piramidën e krimit të organizuar në Kosovë, bashkë me disa avokat të tjerë, qëndron Tomë Gashi. Tom Gashi është hetuar për vite me radhë nga UNMK dhe Eulexi, dhe është i dyshuari kryesor në aferat kriminale, në ndërmjetësime ryshfetesh të mëdha, me ish-prokurorin Salustro, e shumë ndërkombëtarë të tjerë. Kemi edhe sene të tjera, po kaq kësaj radhe…/Ekskluzive.al
