Kurba e koronavirusit po ndjek një linjë ulëse në 24 orët e fundit. Mëngjesin e djeshëm Specialistja e Institutit të Shëndetit Publik, Rovena Daja, tregoi se në krahisim me dy ditë më parë dje janë regjistruar vetëm 10 raste të reja të infektuar me Covid-19.
Sipas të dhënave të publikuara nga ISHP, këto raste u përkasin vatrave të zbuluara më parë si, Kamza, Tirana dhe Shkodra. “Gjatë 24 orëve të fundit janë kryer 275 testime për persona të dyshuar me COVID-19 dhe prej tyre kanë rezultuar pozitivë 10 qytetarë, kontakte të rasteve të mëparshme, pra jo vatra të reja. Rastet pozitive të ditës së sotme janë të shpërndara: 2 të infektuar në Kamëz, 3 të infektuar në Krujë, 2 të infektuar në qytetin e Shkodrës dhe 3 të infektuar në Tiranë”, deklaroi Daja. Sipas saj, që nga fillimi i epidemisë deri më sot janë konfirmuar pozitivë me COVID-19 në të gjithë vendin 842 qytetarë.
“Ndërsa pozitiv shfaqet edhe bilanci i të shëruarve, në total 605 prej tyre tashmë janë shëruar. Aktualisht vetëm 206 pacientë janë aktivë me COVID-19. Pjesa më e madhe e të prekurve po ndiqen nga mjeku i familjes ose janë asimptomatikë, ndërsa momentalisht në dy spitalet COVID, në spitalin infektiv dhe spitalin “Shefqet Ndroqi”, aktualisht janë të shtruar 38 pacientë dhe vetëm 7 prej tyre janë në trajtimin e terapisë intensive”, tha ajo. Më tej Rovena Daja ka bërë edhe një sqarim në lidhje me rastet emergjente, të paraqitur në orët e fundit. Ajo tregoi për rastin e një gruaje shtatzënë e cila rezultoi pozitive me koronavirus, duke e çuar në 5 numrin total të nënave shtatzënë të infektuara.
Reagimi i Tritan Kalos
Ka shumë debate ditët e fundit se kur mund të ketë hyrë virusi në vendin tonë dhe nëse do të kemi një shpërthim të dytë të tij. Duke folur dje në Komitetin e Ekspertëve, mjeku Tritan Kalo është ndalur te mundësia e rishfaqjes së virusit në vjeshtë. “Jemi në një stad ku kemi respektuar elemente si masat e marra, higjiena, ushqimi, distancimi etj. Kjo ka bërë që të kemi situatë më të mirë. Ajo që më brengos është që të mos heqim dorë nga këto sjellje të mira. Që Shqipëria të mbetet në nivelin e vendeve që mund ta përballojë këtë pandemi. Shtimi i rasteve do ndodhë vetëm nëse nuk do respektohen rregullat.
Nuk do ketë rikthim në vjeshtë, por do të jetë i përzier me viruset që qarkullojnë zakonisht në atë periudhë. Se për sa kohë nuk kemi vaksinë, kjo do jetë pjesë përbërëse e florës bakteriale”, tha ai. Por përmes një statusi, doktor Kalo u ka dhënë një goditje politikanëve që deklarojnë se ka më shumë raste viktimash dhe të infektuarish sesa deklarohet. Duket se ky është një mesazh për ish-kryeministrin Berisha. “Jeta kurdoherë do të triumfojë mbi vdekjen. Sars-cov2/covid-19 nuk është militant apo dashamirës i asnjë partie.
Sars-cov2/covid-19 është një “shëndet-vrasës viral” dhe dëmet që ai shkakton mbi shëndetin tonë nuk kanë të bëjnë fare me politikën mjerane, që duan të luajnë disa kokënxehtë te ne…idiotësitë keqdashëse të një grushti të pangopurish me pusht-shtet e pasuri, të pavënë me punë e djersë në këto 30 vite demon-kraci, po turbullojnë jo pak mendjet tona. Po trokas në dyert e vitit të 64 të jetës dhe atij të 39 të ushtrimit të profesionit më fisnik në botë, të mjekut mantelbardhë, por që të lexoj nëpër gazeta, postime në rrjetet sociale, në komente të ndryshme apo të dëgjoj në dalje televizive, se duhet të kemi më shumë te vdekur nga Covid-19 se sa ato që raportohen, këtë gjë as injoranti apo zemërziu më anti-shqiptar nuk mundet ta imagjinojë. Jeni vallë shqiptarë apo bukëshkalë”, tha ai./Sot/ESMERALDA HIDA
