Gent Strazimiri është revoltuar me shqiptarët pse nuk reagojnë për situatën kritike, në të cilën sipas tij, ndodhet Shqipëria. Me anë të një postimi të bërë dje në rrjetet sociale, Strazimiri që është një ndër mbështetësit e Sali Berishës, thotë se shqiptarët e kanë mendjen të shohin “Big Brother” e “Përputhen”, edhe pse nuk kanë bukë të hanë.
“Virtualisht, në këtë vendin që çdo gjë tjetër përveç bukës thatë, e ka luks (përfshi edhe “dashurinë”), të gjithë bisedojnë vetëm për “Big Brother” e “Për’puthen”, por askush nuk pranon se e ndjek.
Nëse e pyet se nga i di zhvillimet e fundit deri në detaje, të përgjigjet se e ndjek ndonjëherë, rastësisht dhe, e bën vetëm për qëllime “studimore”, për të kuptuar se “a ka rënë vërtetë kaq poshtë kjo shoqëri”. Gjithsesi një gjë është e sigurt, e prekshme e aspak virtuale: ditën e transmetimit të tyre, Tirana është bosh.
Secili ka zënë cepin e tij të rrugicës për të shijuar me oreks copën e tij të “Big Brother”, duke pasur në fantazi, në mendje, virtualisht, çdo gjë tjetër që duhet ta kishte realisht e që ia marrin çdo ditë, live, me paralajmërim…
Këtu realja dhe virtualja “Për’puthen” dhe shijohen plotësisht, prandaj nuk ka më as forcë për të reaguar… dhe nuk është film”, shkruan ai. Më tej Strazimiri theksoi se virtualisht mjekësia në Shqipëri është falas, ndërsa vijoi më tej duke thënë se edhe ekonomia virtualisht rritet vit për vit.
“Virtualisht, një shqiptar nuk ka nevojë të lodhet duke shkuar nëpër sportele për të marrë shërbimet që i nevojiten. Gjithçka mund ta bëjë nga shtëpia, përmes e-Albania, si në Skandinaví. Po s’besuat shihni lajmet e Top Channel. Virtualisht, me një “click”, aty gjen certifikatën e lindjes, martesës dhe të vdekjes, detyrimet e taksave dhe tatimeve etj, madje në “mënyrë të unifikuar përmes Web 2.0”, i konceptuar me “qasjen” që në qendër të jetë qytetari….
E thotë krejt qartë Tv Klan në 5 kronikat e para të lajmeve të çdo dite… Virtualisht mjekësia në Shqipëri është falas, si askund tjetër në botë. Shteti shqiptar (aspak virtualisht) paguan disafish më tepër se çdo shtet tjetër për shërbimet që virtualisht marrin qytetarët në spitale, që nga sterilizimi e deri tek dializa.
Në këtë vendin që ha vërtetë vetëm bukë thatë, virtualisht, ekonomia rritet vit për vit, dhe ndërtimi i kullave për frymë popullsie krahasohet vetëm me Dubain”, nënvizoi Strazimiri.
