Gjykata Kushtetuese pritet të kompletohet me 9 anëtarë, përpara se të japë vendimin për shkarkimin ose jo nga detyra të presidentit Ilir Meta.
Këtë të mërkurë Kuvendi i Shqipërisë votoi me 104 vota raportin e Komisionit Hetimor Parlamentar për shkarkimin e presidentit Ilir Meta për shkelje të rënda kushtetuese, ndërkohë që ky vendim tashmë pritet të shkojë për interpretim në Kushtetuese. Do të jetë kjo gjykatë si hallka e fundit që do të vendosë nëse kreu i shtetit do të qëndrojë në detyrë apo do të mbyllë mandatin më herët se korriku i vitit 2022.
Aktualisht Gjykata Kushtetuese ka 7 anëtarë, teksa Vitore Tushës i ka përfunduar mandati dhe pritet të zëvendësohet nga një nga tre emrat e rinj që do të zgjidhen dhe që i takojnë Gjykatës së Lartë. Kjo e fundit pak ditë më parë hapi garën për plotësimin e Kushtetueses, ndërsa gazeta ka mësuar se kanë nisur aplikimet e para. Sipas informacioneve, mësohet se të interesuarit për t’u bërë anëtarë në këtë gjykatë, kanë dorëzuar dokumentacionin pranë Gjykatës së Lartë.
Nis plotësimi me 9 anëtarë i Kushtetueses
Por kjo lëvizje i hap rrugë plotësimit me 9 anëtarë të Gjykatës Kushtetuese dhe se gjasat janë që një gjë e tillë të ndodhë para vjeshtës, kohë kjo që parashikohet që do të jepet vendimi për Metën. Vetë Gjykata e Lartë ka 7 anëtarë dhe pritet që në ditët në vijim Këshilli i Lartë Gjyqësor të emërojë edhe 3 të tjerë, duke e çuar në 10 numrin, i cili është i mjaftueshëm për të vendosur për emrat e rinj që do t’i bashkohen Kushtetueses.
Kështu që, kjo tregon se para se të jepet vendimi për presidentin Meta, Gjykata Kushtetuese plotësohet me 9 anëtarë. Kjo do të thotë se vendimi për shkarkimin e kreut të shtetit nga detyra, pritet të merret nga 9 anëtarë, ku duhen 5 vota për të bërë diferencën, e cila është plotësisht e arritshme, pasi gazeta ka mësuar se Meta ka vetëm 1 votë të sigurt në këtë gjykatë, e cila është ajo e Sonila Bejtes.
Ndërkohë që Marsida Xhaferllari që deri më dje thuhej se mbante krahun e presidentit, sot që flasim është më afër Partisë Demokratike, pasi është bashkëjetuesja e deputetit të zgjedhur demokrat, Enkelejd Alibeaj, ku vlen të theksohet fakti se raportet mes kryedemokratit Lulzim Basha dhe kreut të shtetit janë përmbysur pas zgjedhjeve të 25 prillit.
LSI braktis Metën
Megjithatë, goditja që pritet të marrë Ilir Meta nga Gjykata Kushtetuese nuk është e vetmja, pasi ai tashmë është braktisur edhe nga bashkëpunëtorët e tij. Shumica e ish-deputetëve të Lëvizjes Socialiste për Integrim duket se kanë lënë në baltë presidentin Ilir Meta, në një moment tepër delikat për karrierën e tij politike.
Kuvendi i Shqipërisë të mërkurën e shkarkoi Metën nga detyra, ndërsa LSI, Monika Kryemadhi sot që flasim nuk kanë mbajtur asnjë qëndrim zyrtar për këtë vendim. Madje, nga LSI ka pasur disa reagime spontane nga emra si Petrit Vasili, Klajda Gjosha apo Endrit Braimllari që marrin në mbrojtje Metën, por asnjëri prej tyre nuk është zyrtar dhe se nuk mjaftojnë. Kjo tregon se LSI ka braktisur Metën, duke e lënë këtë të fundit në baltë sa i takon “luftës” me mazhorancën qeverisëse.
