Pas reformës së ndërmarrë nga ana e qeverisë në lidhje me spastrimin e administratës, ka rezultuar se bashkitë që drejtohen nga LSI kanë bërë batërdinë me punësimet. Kryebashkiakët e LSI, në 4 bashki të ndryshme të vendit, nga 8 që zotëron Lëvizja Socialiste për Integrim, kanë shkelur në mënyrë abuzive ligjin për emërimin dhe statusin e nëpunësit civil. Gazeta ka siguruar raportin e Komisionerit për Mbikëqyrjen e Shërbimit Civil, të vitit 2018, ku tregohen të gjitha shkeljet e kryebashkiakëve të LSI. Sipas raportit, bashkia me më shumë shkelje në radhët e LSI në lidhje me punësimet, është ajo e Prrenjasit. Nga mbikëqyrja e bërë nga ana e Komisionerit në këtë bashki, ka rezultuar se janë bërë mbi 60 punësime në mënyrë abuzive. Njësia përgjegjëse për menaxhimin e burimeve njerëzore në Bashkinë Prrenjas, sipas raportit të siguruar nga gazeta, nuk ka zbatuar në asnjë emërim të bërë në radhët e administratës procedurat e përcaktuara në ligj. Sakaq, aty thuhet se kryebashkiakja e Prrenjasit ka punësuar edhe punonjës që nuk përmbushin as kriteret arsimore. Duke parë këto shkelje masive Komisioneri i Mbikëqyrjes i ka kërkuar kryebashkiakes së LSI që të marrë masa dhe t’i largojë nga postet që mbajnë të gjithë të emëruarit në administratë brenda një periudhe 60 ditore. “Për kryerjen e këtyre veprime administrative, lihet afat 60 ditë nga marrja dijeni për këtë vendim. Institucioni i mbikëqyrur dhe njësia përgjegjëse, duhet të zbatojnë këtë vendim duke u bazuar në orientimet e dhëna në përmbajtjen e raportit përfundimtar të mbikëqyrjes”, thuhet në raport.
Tri bashki të tjera në shkelje
Komisioneri për Mbikëqyrjen e Shërbimit Civil ka zbuluar gjithashtu se krahas Bashkisë së Prrenjasit, në shkelje janë dhe tre njësi vendore të tjera që drejtohen nga LSI. Sipas raportit, një ndër këto njësi që ka kryer po ashtu abuzime masive në emërimet e administratës është dhe Bashkia e Kuçovës. Kryebashkiaku i kësaj njësie ka punësuar mbi 30 nëpunës në shkelje të hapur me ligjin, nga të cilët është kërkuar, nga ana e Komisionerit të Mbikëqyrjes, shkarkimi nga detyra për 17 prej tyre. Sipas raportit të Komisionerit, këto 17 emërime janë kryer në mënyrë informale pasi nuk është bërë asnjë shpallje për pozicione të lira pune në Bashkinë e Kuçovës. “Të konstatohet pavlefshmëria absolute e akteve të emërimit (17 raste) nga Kryetari i Bashkisë Kuçovë, sipas orientimeve në përmbajtjen e raportit përfundimtar të mbikëqyrjes dhe të rregullohen pasojat, duke i ndërprerë marrëdhënien e punës dhe atë financiare me institucionin, punonjësve të emëruar në kundërshtim me procedurën e përcaktuar në ligjin nr. 152/2013, “Për nëpunësin civil”, të ndryshuar”, thuhet në raport. Por krahas kësaj, në raport thuhet gjithashtu që dhe në Bashkinë e Gjirokastrës dhe atë të Delvinës ka abuzime me punësimet, por që janë më të pakta. Sipas raportit të Komisionerit të Mbikëqyrjes, kryebashkiakja e Gjirokastrës ka kryer në kundërshti të hapur dy emërime në administratë sa i takon pozicionit të specialistes në zyrën e integrimit në BE. Ndërkohë sa i takon Bashkisë Delvinë, kryebashkiaku i kësaj njësie vendore po ashtu ka emëruar në kundërshti me statusin e nëpunësit civil 3 punonjës. Ndërsa në katër bashkitë e tjera të LSI, Komisioneri i Mbikëqyrjes, ka urdhëruar që të ngrihen grupet e punës dhe të monitorojnë të gjitha emërimet e bëra në administratë./Endri ARIZI
