Mero Baze
Problemi më i madh që ka sot opozita e Berishës është humbja e besueshmërisë në publik dhe përpjekja e saj e mundimshme që tani gënjeshtrat e saj t’i shesë në gjuhë të huaj dhe t’i përkthejë përsëri në shqip, që të mos duken të sajat.
E bëri një skandal me një portal anonim italian para shtatë vitesh, duke shpikur 1500 maune me pesticide që po varroseshin në Pukë, e bëri po ashtu me Bildin para dy vitesh, që i shitën një dosje të mbyllur të Prokurorisë, ashtu siç e kanë rishitur prapë dje, dhe po ashtu po bëjnë sot edhe me gazetarin e RAI3.
Por deri tek furnizimi i tyre me gënjeshtra ndoshta dhe me parë është në rregull, se është çështje biznesi mes të dyve. Problemi që ka Berisha është se pastaj entuziasmohet nga gënjeshtrat e veta dhe do të riciklohet përmes tyre.
Po qe se ka një mënyrë se s’iu ta zvogëlosh dhe atë pak rëndësi që pati më në fund reportazhi i RAI 3, është kjo mënyra se si po vepron Berisha dhe aleatët e tij në Tiranë.
Edhe pse intervista e Edi Ramës ishte shteruese për çdo akuzë dhe detyroi gazetarin t’i quante akuza dhe jo fakte, pra të ofruara nga opozita, sot ata që ai kanë ofruar akuzat, gëzohen që i dëgjojnë në italisht dhe përsërisin thirrjet banale për protestë apo revolucion.
Gazetari i RAI u përpoq sa mundi të mbante distancë se nuk jam duke i shërbyer Berishës me këto akuza, por Berisha nuk ka shumë mëshire në këtë rast. Atij i duhet doemos ta çojë deri në fund shpenzimin e tij me këtë rast, njësoj si me Bildin, që i paguan gazetarit hotelin në Marriot dhe udhëtimet në Tiranë.
Ky stil opozitar, që merr hua fytyrën dhe zërin e dikujt tjetër në gjuhë të huaj, kur ti kupton se opinion publik nuk të beson më për asgjë, se mediat afër teje nuk janë të besueshme për asnjë investigim, dhe mbi të gjitha, rezultati elektoral i akuzave është zero, tani është kthyer në modën më të re.
Njësoj siç bërtiste vite më parë për revolucion, pas çdo deklarate për shtyp apo ngjarjesh të sajuara, tani bërtet sa herë gënjeshtrat e tij përkthehen në gjuhë të huaja.
E vetmja gjë pozitive e kësaj është se opozita është koshiente se nuk ka shanse të besohet ajo që thotë vet dhe paguan apo stërmundohet që gënjeshtrat e saj t’i përsërisë dikush tjetër, me shpresë se duken më serioze.
Problemi është që shqiptarët i kanë dëgjuar këto akuza shumë herë më të rënda dhe shumë herë më të qarta nga opozitarët e Berishës, se sa nga përkthyesit në gjuhë të huaj, dhe nuk pinë më ujë. I vetmi zhvillim i ri është se u duhet të paguajnë pak më shumë për të fituar më pak.
Më kollaj e kanë të ndryshojnë njerëzit e pabesueshëm që kanë në krye, dhe kauzat familjare për të cilën bëjnë opozitë, se ashtu besohen dhe ato që nuk kanë ndodhur, kurse kështu nuk besohen as ato që ndodhin, vetem për shkakun se njeriu që i thotë dhe paguan për t’i përhapur, është zanafilla e gjithë problemeve në këtë vend.
Dhe është dëshpërim shumëfish më i madh, kur je i bindur që ty nuk të besojnë, por shpreson se mund t’i gënjesh me të njëjtat gënjeshtra, por në gjuhë të huaj.
