Nga Mero Baze
Fotografia e vetme që mund t’i mbetet në mendje një qytetari të zakonshëm të botës sot, nëse sheh lajmet në BBC, CNN apo diku tjetër, është se udhëheqësit e Bashkimit Evropian janë mbledhur në Tiranë për të debatuar mbi shanset e zgjerimit të Evropës në Ballkan dhe shanset e paqes në Ukrainë. Dhe kjo e lidh Shqipërinë me Perëndimin në mendjen e tyre, si një vend normal evropian.
Vendi i cili ka tre ditë që ka përfunduar zgjedhjet, është sot i pushtuar nga Bashkimi Evropian dhe i përfshirë në interesa konkrete me secilin prej vendeve anëtare.
30 vite më parë, dy ditë pas zgjedhjeve të 26 majit, skena që pa bota nga Shqipëria ishte fytyra e përgjakur e Servet Pëllumbit, syri i nxirë i Blendi Gonxhes, dhëmbët e thyer të Arben Imamit dhe tërheqja zvarrë e Neritan Cekës, dhe shkopi i Gjeneral Agim Shehut që vërtitej mbi kokat e tyre.
Nga ata që rrahën opozitën atëhere ka mbetur në këmbë vetëm Sali Berisha, i cili sot thirri një miting në mbështetje të tij në një cep të bulevardit të ri, si per t’u kujtuar të gjithëve sa pak vetë janë kundër Shqiperise sot.
Sot shikon se si Shqipëria ka tërhequr zvarrë 27 kryetarë shtetesh dhe ka kthyer vëmendjen nga vetja e saj si një vend evropian.
Kryeministri Edi Rama ka ditur të përdorë problemet e politikës së brendshme të vendeve të Bashkimit Evropian për t’u bërë pjesë e zgjidhjes së tyre, në këmbim të mbështetjes për Shqipërinë dhe përshpejtimit të procesit të anëtarësimit. Ai nënshkroi një marrëveshje të debatueshme për emigrantët ilegalë në Itali, që më pas u bë objekt i debatit për t’u aplikuar dhe nga vende të tjera të BE-së.
Ndërkohë që Samiti Evropian i Tiranës duket se dominon skenën, dy nga udhëheqësit më të rëndësishëm të Evropës kanë përdorur këtë udhëtim për të bërë vizitat e tyre zyrtare.
Kryeministri britanik Keir Starmer ishte i pari që filloi vizitën zyrtare në vend, e cila pritet të përfundojë me një Traktat Miqësie mes dy vendeve – një ngjarje e paimagjinueshme për Shqipërinë – ndërsa Edi Rama po përpiqet të zgjidhë çështjen e emigrantëve shqiptarë në Londër që janë deklaruar si kosovarë, dhe t’i krijojë lehtësi Britanisë së Madhe për kthimin e emigrantëve ilegalë shqiptarë.
Pas tij, sot presidenti Emmanuel Macron bashkë me Zonjën e Parë të Francës do të nisin vizitën zyrtare si president i Francës në Shqipëri – e dyta brenda dy viteve dhe të vetmet vizita zyrtare të një presidenti francez në Shqipëri në historinë 113-vjeçare të shtetit shqiptar.
Ndërkohë që samiti përfundon sot, paralelisht me të zhvillohet një nga forumet më të rëndësishme të biznesit për Evropën, “FII Priority Europe”, i cili ka bashkuar aktorët më të rëndësishëm politikë dhe të biznesit në Evropë dhe SHBA, për të diskutuar mbi sfidat gjeopolitike të biznesit në kohët e reja dhe të ardhmen e investimeve në Evropë.
Ditën e shtunë, në këtë forum do të flasë biznesmeni amerikan Jared Kushner, dhëndri i presidentit Donald Trump, i cili qëndron pas një prej projekteve më të mëdha të investimeve në turizëm në ishullin e Sazanit në Shqipëri.
Për vetëm tre ditë, Shqipëria është bërë shtëpia e Evropës, vendi mikpritës i dy prej udhëheqësve më të rëndësishëm të Evropës – Presidentit të Francës dhe kryeministrit të Britanisë së Madhe – dhe ka qenë mikpritëse e një prej forumeve më të rëndësishme të biznesit në botë, duke pasur si spiker edhe dhëndrin e presidentit Donald Trump.
Kjo është koha më e mirë e Shqipërisë në vite, dhe shansi më i madh i saj për t’u bërë një vend i zhvilluar dhe i integruar në Bashkimin Evropian. Dhe për ata që janë mërzitur nga humbja në zgjedhje, kjo është Shqipëria madhështore. Berisha ua premtoi pas katër vitesh, por e keni para syve pas katër ditësh.
