Nga Alteo Hysi
Pavarësisht rrugës së gjatë e të vështirë drejt tij, rrugë që i ngjan një të përpjete që duhet ngjitur me të gjitha energjitë, Bashkimi Europian vijon të mbetet një pikë e fuqishme tërheqëse për Shqipërinë dhe shqiptarët si një model vlerash që na frymëzojnë të gjithëve ditë pas dite.
Së fundmi, “Eurobarometri”, një vëzhgim i Komisionit Europian për vitin 2018 ka gjetur mes shqiptarëve të anketuar një shkallë të lartë besimi dhe imazhi pozitiv që ata kanë për Bashkimin Europian. Kështu, duke iu përgjigur pyetjes nëse Bashkimi Europian iu ngjall një imazh pozitiv apo negativ, 86% e shqiptarëve të moshës 15-26 vjeç shprehen pozitivisht.
Këto gjetje bëhen edhe më interesante kur ky besim reflektohet nga shqiptarët shumë më shumë se sa nga vetë shtetasit e Bashkimit Europian. 85 % e shqiptarëve nga mosha 25 deri në 39 vjeç kanë imazh pozitiv për BE kundrejt 44 % e shtetasve të vetë BE për unionin ku bëjnë pjesë.
Këto shifra nuk janë disa tregues të pjesshëm të një grushti shqiptarësh të anketuar, të izoluar nga ai që është perceptimi i përbashkët i shqiptarëve për BE-në. Janë të gjithë tregues të asaj energjie njerëzore dhe besimi që i mban të gjithë shqiptarët të lidhur drejt qëllimit të vetëm, Integrimit European, pavarësisht rrugës që sa vjen e bëhet edhe më sfiduese.
Besim që vjen jo vetëm për shkak të lidhjes së fortë me Europën si një ndër popujt më të vjetër të saj, por sepse në këtë “uri” të madhe që ka Shqipëria për të përmirësuar e progresuar vetveten, modeli më i mirë për t’u ndjekur është Bashkimi Europian. Mekanizmi më i mirë për ta bërë të mundur këtë ndryshim është kalimi përmes procesit drejt integrimit Europian, duke filluar që nga çelja e negociatave si një korsi ku rregullat, masat, monitorimi shtohen edhe më shumë, e bashkë me to edhe transformimi pozitiv.
Në anë tjetër, kjo fuqi e madhe besimi e shqiptarëve te BE është një shuplakë për të gjithë ata që e mbarsin çdo ditë opinionin publik me idenë se integrimi European për Shqipërinë është një ëndërr e vdekur, e pashpresë, që nuk i hyn në punë as dreqit, që për ne do të mbetet gjithmonë e largët sepse “nuk kemi plotësuar asnjë kusht”.
Ky është besimi i shqiptarëve që zotërojnë një ndjenjë përkatësie ndaj Europës, e i po të njejtëve shqiptarë që besojnë se po bashkë mund të tejkalojnë çdo sfidë, përfshirë edhe përmirësimin e vetvetes. E po të gjithë bashkë mund të shembim çdo makineri balte që dita ditës i vendos “kushte” Shqipërisë, duke ushqyer fantazinë se “Shqipëria nuk e meriton prekjen e kësaj ëndrre”!
