Krijimi i një fronti europian dhe heqja e kufijve mes shqiptarëve, mbetet një nga objektivat kryesor i BDI-së në Maqedoninë e Veriut.
Lideri i kësaj force, Ali Ahmeti së bashku me kryeministrin e parë shqiptar, Talat Xhaferi zhvilluan një takim të premten në Kumanovë. Qytet ky ku rreth 30% e banorëve janë shqiptarë dhe që në zgjedhjet pasardhëse që do të mbahen pas 100 ditësh vota e tyre do të ketë një faktor të madh në formimin e qeverisë së re. Por për shqiptarët e Maqedonisë së Veriut kjo fushatë elektorale ka një rol të madh pasi synojnë që të drejtojnë qeverinë.
“Të bashkohen shqiptarët në Maqedoni. Të mbajnë mandat të fuqishëm. Sepse mandatet të japin edhe forcë. Mandatet të bëjnë të rëndësishëm si në tavolinë ashtu dhe në politikë. Prandaj ne nuk heqim dorë. I thërrasim të gjithë partitë politike të vegjël të mëdhenj. Kështu që hapësirë dhe vend ka për të gjithë. Të ushqejmë vllazërinë, bashkimin, sepse vetëm bashkë arrijmë tek objektivi”– tha Ali Ahmenti, kryetar i BDI.
Bashkëpunimi dhe me maqedonasit, për Ali Ahmetin, do të jetë kyç në këtë objektiv, të cilët po ashtu i sheh si aleatë.
“As nuk pendohem që kam qenë kundër ndarjes së Maqedonisë në vitin 2001 kur mua mu vendos përpara nga institucionet e shteti për ndarje. Dhe nuk pendohem. Sepse zgjodhëm rrugën më të drejtë edhe për shqiptarët edhe për maqedonasit, sepse çdo ndarje do të pasonte me tragjedi për të dy kombet. Nuk gjykuam me mendjen e forcës, por atë të arsyes. Jo qiraxhinj në shtëpinë tonë”– tha Ali Ahmeti.
Por teksa BDI ka nisur përgatitjet për fushatë dhe përmbushjen e detyrave në qeveri, partitë shqiptare vijojnë të jenë të përçara mes tyre. Kryetari i partisë Aleanca për Shqiptarët Arben Taravari vendosi që t’i bashkohet opozitës shqiptare për zgjedhjet që do të mbahen në pranverë. Ky veprim ka nxitur debate brenda kësaj force pasi bashkëpunëtorët e tij kanë dalë kundër. Ish-kryetari i ASH-së, Ziadin Sela theksoi në rrjetet sociale se nuk ishte njoftuar për këtë vendim pasi deri më tani s’ka pasur asnjë ofertë koalicioni nga partitë e tjera politike.
