Ndjek ish të dashurën që ndodhej në makinë me partnerin e ri dhe qëllon drejt tyre me armë zjarri. Ngjarja ka ndodhur mbrëmjen e djeshme në Vicenza të Italisë dhe personi që shkrepi këmbëzën është shqiptar, ashtu si ish e dashura.
Siç raportojnë mediat lokale, ora shënonte rreth 20:30, kur 20-vjeçarja shqiptare ishte në bordin e një “Mercedesi” që drejtohej nga partneri i saj serb. Në sediljet e pasme ndodheshin një çift miqsh. Një makinë “Mini Cooper” është në ndjekje të tyre. Aty ndodhen dy shqiptarë, ish i dashuri i 20-vjeçares dhe një mik i tiji: 26-vjeçari Graciano Qori e M.K., të dy 26 vjeç dhe me precedentë të mëparshëm në shtetin fqinjë.
Vajza, e alarmuar nga prania e Mini Cooper-it, lajmëron Policinë. Drejtuesi i makinës Mercedes tenton të shmangë ndjekësit, por drejtuesi i Mini Cooper-it e drejton makinën paralel me Mercedesin, dhe në lëvizje e sipër kërcënon nga dritarja pasagjerët e mjetit tjetër me një pistoletë.
Ndjekja vijon për një copë kohe deri në rrugën “Fermi”, ku nga Mini Cooper-i qëllohet 3 herë me pistoletë: Një në ajër dhe dy në drejtimin të Mercedesit, te gomat e mjetit.
Një tjetër telefonatë vë në lëvizje Policinë që dërgon dy patrulla në sheshin “Del Sole”, ku ndërkohë u zhvendos ndjekja. Në rotondon “Albera” qëllohet edhe dy herë me pistoletë.
Mercedesi shkon drejt patrullave të Policisë për të kërkuar ndihmë, ndërsa Mini Cooperi largohet me drita të fikura.
Vajza 20-vjeçare u tregon efektivëve se e njeh një prej personave në makinën që i ndiqte. Agjentët vihen në ndjekje të Qorit, i cili ndalohet rreth orës 23 dhe shoqërohet në Polici. 26-vjerçari është denoncuar për dhunë, kërcënim, dëmtim prone dhe prishje të qetësisë publike. Është proceduar penalisht edhe M.K., por ai nuk është arritur të ndalohet ende nga Policia. Këtë mëngjes, Policia nisi edhe praktikat e dëbimit nga Italia të Qort, raportojnë mediat lokale.
Me ndihmën e disa banorëve, u gjet dhe sekuestrua edhe arma me të cilën qëlloi Qori. Arma, një pistoletë tip “Scacciacani” u hodh nga dritarja e makinës dhe u gjet në sheshin “Crispi”, pranë një salle lojërash elektronike.
