Shqipëria pritet që të mbushet me avokatë. Kjo jo vetëm për shkak të numrit të madh të studentëve që dalin nga Fakulteti i Drejtësisë, pasi të gjithë të ngelurit në veting dhe të dorëhequrit po marrin licenca avokatie.
Edhe pse deri dje këta prokurorë dhe gjyqtarë luftonin për të ndëshkuar kriminelët, tani ata do i mbrojnë. Gazeta një ditë më parë bëri të ditur se të gjithë të shkarkuarit nga KPK rendin të ndjekin Shkollën e Avokatisë, ndërsa nga një verifikim i bërë rezulton se të njëjtën gjë po bëjnë dhe të dorëhequrit nga sistemi. Janë rreth 60 gjyqtarë dhe prokuror që kanë lënë detyrën para se të futeshin në veting.
Por shumica e këtyre emrave janë pajisur me licenca avokatie. Nga një verifikim i bërë në Qendrën Kombëtare të Biznesit, rezulton se disa emra të njohur janë me licenca avokatie. Arjana Fullani, ish-anëtare e Gjykatës së Lartë, ishte ndër të parat që u largua nga sistemi.
Pasi i mbaroi mandati si gjyqtare ajo refuzoi të kalonte në Apel. Madje ajo zhvilloi një betejë të fortë në KPA duke mos pranuar t’i hiqej statusi i magjistrates, por që në fund nuk ia doli. Fullani ka hapur studio avokatie prej disa kohësh. Kolegë të saj që kanë ndjekur të njëjtën rrugë janë dhe Aleksandër Muskaj, Guxim Zenelaj, Evelina Qirjako, që të tre ish-anëtarë të Gjykatës së Lartë. Por dy emra të tjerë të njohur që i janë futur avokatisë janë edhe Gjin Gjoni me Alaudin Malaj.
Të dy ish-anëtarët e Apelit u dorëhoqën para se të futeshin në procesin e vetingut. Për ironi që të dy janë ndër emrat me pasurinë më të lartë në radhët e gjyqësorit. Por si shumë të tjerë edhe ata para se KPK të bënte seancat dëgjimore dhanë dorëheqjet dhe i shpëtuan këtij procesi. Por duket se nuk do largohen nga sistemi sepse tashmë kanë hapur zyra avokatie.
Në të njëjtën linjë janë dhe disa gjyqtarë e prokurorë rrethesh të dorëhequr që po ashtu janë pajisur me zyra avokatie. Mes emrave është dhe ai ish-Kryeprokurorit të Tiranës, Petrit Fusha. Edhe ai ka hapur zyrë avokatie. Sipas QKB zyra e avokatisë është hapur më 13/05/2019.
Ajo që bie në sy është se Bashkimi Europian në progres raportin e fundit kërkon që të nisin hetimet ndaj të ngelurve në veting, pasi pretendohet se pasuria e tyre është e paligjshme dhe prokuroria duhet të vihet në lëvizje.
Alarmi i avokatëve penalistë
Pak kohë më parë ishte kreu i Shoqatës së Avokatëve Penalistë, Saimir Visha, ai i cli dha alarmin për atë që po bëjnë të shkarkuarit apo dorëhequrit nga vetingu. “Ata që janë përjashtuar nga vetingu kanë dhënë shumë vendime të padrejta dhe tashmë ata po vuajnë nga këto vendime.
Këta gjyqtarë dhe prokurorë që janë shkarkuar nga vetingu duhet të përballen me drejtësinë për të gjitha vendimet e padrejta që kanë dhënë dhe që dalin dhe qajnë tani me lot krokodili që pse janë shkarkuar. Ata tani po hapin edhe qendra avokatie, por për këtë vendim të këtyre i takon SPAK që të reagojë dhe të arrijë në një përfundim.
Ata kanë dhënë shumë vendime të padrejta që tani po i vuajnë të dënuarit, të cilët kanë dalë në grevë urie dhe unë do jem si përfaqësues i tyre për t’i dëgjuar të gjitha shqetësimet që ata kanë”, u shpreh avokati Saimir Vishaj pak kohë më parë.
