Par disa kohësh qarkulloi në portale një lajm sipas të cilit, revista amerikane NewsWeek i jepte një goditje të fortë Kryeministrit Rama lidhur me situatën e kanabisit në vend.
Sipas portaleve, Newsweek i kushtoi Shqipërisë një artikull të gjatë mbi problemin e drogës.
Revista Newsweek – shkruajnë portalet tona – thotë se lufta e Edi Ramës me kanabisin rezultoi thjesht një fushatë marketingu politik.
Por me sa duket, në nxitimin maratonomak për ti nxirrë kush e kush më shumë faqen Shqipërisë, veç portaleve, janë përfshirë edhe disa gazetarë të rinj përmes artikujve dizinformues. Arsyeja?
Së pari, artikulli që i referohen portalet shqiptare nuk është një shkrim redaksional i vetë revistës Newsweek, as ndonjë hulumtim apo analizë e redaksisë së revistës.
Sic duket në artikullin original, redaksia e publikon atë brenda zhanerit OPINIONE, si një artikull me qasje subjektive të dy autorëve Vincent Triest dhe Will Nicoll.
Pra portalet shqiptare po mundohen të na shesin një opinion personal të dy autorëve, si një tjetër goditje nga mediat e huaja për qeverinë Rama.
Së dyti, sa personal dhe jo profesional është shkrimi në zhanerin e opinionit, kuptohet kur lexon se si dy autorët citojnë vetëm Lulzim Bashën dhe për cudi Rudina Hajdarajn, dy demokratë që për hir të së vërtetës nuk e kanë kursyer baltën në prononcimet e tyre.
Një gazetar me sadopak vite experience e ka të qartë se në një cështje me seriozitet kaq të madh, duhet minimalisht ti ballafaqosh të gjitha palët, vecanërisht ata të cilët ti i akuzon si përgjegjës. Në këtë rast autorët ia hedhin përgjegjësinë qeverisë, por prononcimet e kësaj pale nuk shihen kurrkund në artikull.
Së treti ka një problem në raport me kompetencën profesionale të autorëve për çështjen.
Vincent Triest e njohim të gjithë si ish gazetarin shqiptaro-hollandez të ABC NEWS që dallohet për interesin e tij në politikën e jashtme, me zero eksperincë në gazetarinë e kronikës apo krimeve. Meqënëse shkrimi është opinion, Vincenti justifikohet deri diku, por ama, të shprehësh pikëpamjet e tua mbi një cështje që ka angazhuar edhe faktorin ndërkombëtar, minimalisht duhet të kesh përgjegjësinë për të vënë palët përballë.
Fokusimi i vëmendjes vetëm te akuzat e Bashës dhe politikanes fare, fare të re si Hajdaraj, të lë të kuptosh se artikulli është një instrument i porositur nga interesa të caktuara politika.
Më skandaloze dhe më qesharak bëhet artikulli, kur mëson profilin e gazetarit tjetër me të cilin Vincenti ka zgjedhur të ndajë autorësinë e artikullit të paguar.
Will Nikoll është një gazetar britanik që shkëlqimin e vet e ka patur në revistën Men’s Health (Shëndeti i Meshkujve).
Dhe e dini cila është fusha e tij e preferuar për të mbuluar në media? Seksologjia!
Ky është një nga artikujt ku Nikoll lajmëron lexuesit meshkuj se femrat preferojnë penis të mëdhenj dhe nga kjo e dhënë, ai flet gjërë e gjatë për metodën e peno-plastikës, operacionit të thjeshtë plastik për rritjen e penisit.
Që gazetari është i thelluar në këtë fushë sikurse e dëshmon edhe me shkrime të tjera, nuk ka asnjë problem. Por të shkruash për rritjen e prodhimit të kanabisit, nuk është e njëjta gjë si të shkruash për rritjen e penisit.
