Kryetarja e bashkisë Shkodër Voltana Ademi nuk ka pritur shumë gjatë që t’i kthejë një përgjigje drejtorit të përgjithshëm të ARRSH Afrim Qendro lidhur me By Pass-in e Shkodrës. Ky i fundit gjatë ditës së sotme i bëri një thirrje kryebashkiakes që të japë dritën jeshile lidhur me By Pass-in e Shkodrës për ta përfunduar këtë investim duke pretenduar se vetë kryebashkiakja ka rënë dakord.
E indinjuar nga kjo deklaratë dhe fakti që drejtori Qendro bëri fajtore kryebashkiaken, Ademi thirri mediat për të dalë në një deklaratë për shtyp ende pa përfunduar orarin zyrtar të punës.
Pak e tensionuar në leximin e deklaratës që kishte përpiluar vetë kryebashkiakja nxitoi të thotë që në fillim se pretendimet e Afrim Qendros janë gënjeshtër ose duke mbushur gojën në dialektin shkodran, “rren ditën për diell” tha Ademi.
Pasi paraqiti të gjitha pretendimet e saj se për njërin lot të By Pass-it s’ka fare projekt dhe se për tjetrin projektin nuk e ka ende në dorë bashkia Shkodër, kryebashkiakja u zu ngusht kur u pyet se në kohën e ish-kryeministrit Sali Berisha, ai By Pass për të cilin Ademi po thoshte se nuk ka as projekt dhe as leje ndërtimi, a e ka patur këtë leje ndërtimi dhe këtë projekt ajo nuk ktheu asnjë përgjigje. Duke u munduar që të mos i bie ndesh Berishës duke e ditur se çfarë mund ta gjejë mbrapa brenda radhëve të PD, kryebashkiakja u mjaftua me një përgjigje të shkurtër se gjithçka është në shkresat përkatëse, përgjigje që në fakt nuk thotë asgjë por është thjeshtë për të dalë shpejt e shpejt nga situata.
Pretendimet e Ademit ndaj ARRSH për By Pass-in mund të jenë të gjitha të sakta dhe të drejta por ashtu siç kritikon qeverinë aktuale apo ARRSH-në tani, Ademi nëse pretendon se është delir i drejtësisë në mesin tonë atëherë duhet t’i thotë të vërtetat që nga fillimi se si ai By Pass ka nisur pa leje ndërtimi që në kohën e ish-kryeministrit Berisha (nëse është kështu gjithmonë) dhe të përmendet edhe të gjitha problematikat e tjera të asaj kohe. Në fakt për ta rikujtuar By Pass-i ishte një vendim që në atë kohë u trumpetua me shumë bujë nga ish-kryeministri Berisha por që shumë shpejt u pa se dështoi dhe u la për vite të tëra si një gërmadhë, ashtu siç vijon edhe sot. Dhe këtu Ademi do ishte mirë ta thoshte njësoj fjalën e saj si një kryebashkiake që ka pakt vetëm me drejtësinë./ShkodraNews
