Policia e Shtetit ka mbyllur sytë dhe veshët përballë skenarëve destabilizues të Sali Berishës. Ish-kryeministri tentoi të shtunën marrjen me forcë të selisë së Partisë Demokratike ku mund të kishte një tragjedi të ngjashme me atë të “21 Janarit”.
Por ashtu siç ndodhi në vitin 2011 edhe këtë herë Berishës nuk i ka hyrë gjë në këmbë. Policia arrestoi dje 34 persona dhe u proceduan 18 të tjerë, por mes tyre nuk ishte emri i Berishës, edhe pse ai është organizatori i protestës.
Policia procedoi Flamur Nokën si organizator, duke mbyllur sytë përballë deklaratave dhe lëvizjeve të Berishës. Por interesant është fakti se policia sfidoi edhe ambasadën e SHBA. Teksa efektivët shihnin nga larg dhunë në PD dhe nuk ndërhynin, organi i vetëm që reagoi ishte ambasada e SHBA, e cila e bëri të qartë se Berisha duhet të përballet me drejtësinë, por në fakt policia sërish u tremb përballë ish-kryeministrit.
“SHBA-të janë thellësisht të shqetësuara me rritjen e tensioneve në ndërtesën e selisë së Partisë Demokratike dhe përdorimin e forcës. U bëjmë thirrje organizatorëve të protestës që të refuzojnë dhunën dhe të ushtrojnë qetësi. Ata që nxisin dhunën ose minojnë sundimin e ligjit do të mbahen përgjegjës”, thuhej në deklaratën e ambasadës. Por policia shkoi dhe procedoi sekretarin e PD, Gazment Bardhi, i cili ishte brenda mureve dhe përballej me dhunën e jeniçerëve të “Foltores”, ndërsa Berisha që i udhëhiqte ja hodhi paq.
Ja si Berisha organizo protestën
Të gjitha faktet tregojnë se protesta organizohej dhe drejtohej nga Berisha. Sulmi ndaj godinës agravoi kur Berisha dha sinjalin, ndërkohë ai gjatë gjithë kohës i orientonte protestuesit me duar si dhe komunikonte me telefon. Militantët teksa merrnin udhëzime nga ish-kryeministri shqyen dyert e jashtme të selisë, por nuk depërtuan më shumë se sa deri te kati i parë për shkak se nuk mundën të shpartallonin të gjitha dyert e blinduara. Këto tentativa treguan qartë se Berisha ishte organizatori i kësaj proteste.
Po ashtu një ditë para 8 janarit ai vetë lajmëroi se dyert e selisë do të hapeshin patjetër dhe do të përdorej çdo lloj mjeti për të hyrë brenda. “Nëse e gjen derën e mbyllur do ta hapësh. Do përdoren gjëra për të hapur dyert. Asnjë qime floku nuk do t’i preket kujt. Dyert do t’i hapim. Po i hapi Basha ne nuk do të përdorim asnjë mjet. Nëse ai na detyron…do të përdorim të gjitha mjetet.
Ajo është selia jonë”, u shpreh ai. Por Policia duke injoruar gjithë këto, në një mënyrë absurde procedoi Sekretarin e Përgjithshëm Gazment Bardhin dhe arrestoi shumë prej atyre që ishin të pranishëm në oborr por edhe brenda selisë. Po ashtu një sërë deputetësh pritet të merren në pyetje. Bardhi u shpreh se është e pashpjegueshme sesi Policia pas një dite terrori të organizuar nga ish-kryeministri, shkon dhe shoqëron ata që thjesht kanë dashur të ikin në familjen e tyre.
Sipas tij, përqendrimi i Policisë duhet të ishte tek orkestrimi i dhunës që urdhëroi dhe orkestroi Berisha.“Cilido që ka qenë në mbledhje dhe ka tentuar të shkojë tek fëmijët e tij pas një dite terrori të organizuar nga Berisha shoqërohet nga Policia pa asnjë shpjegim. Mos u përqendroni tek shkopinjtë siç u përqendruat tek dyert ndërkohë që Berisha orkestroi akte dhune. Ne nuk na dhanë fat dyert e blinduara. Ne nën përgjegjësinë që na kanë dhënë demokratët kishim marrë masa për të shmangur përplasjet mes demokratëve. Ndërkohë Berisha dha urdhër që të sulmoheshin njerëzit brenda”, u shpreh Bardhi./Sot
